Тошкент, Ўзбекистон (UzDaily.uz) — Тожикистон футзал терма жамоаси 8 ва 10 ноябрь кунлари Тошкентда Ўзбекистон терма жамоасига қарши ўтказиладиган иккита ўртоқлик учрашуви учун таркибни эълон қилди.
Тожикистон терма жамоаси бош мураббийи Пайрав Воҳидов бўлажак учрашувларга 14 нафар футболчини — икки нафар дарвозабон ва 12 нафар майдон ўйинчисини жалб қилди.
Дарвозабонлар сафидан «Сипар» клуби аъзоси Фируз Бекмуродов ва «Соро компания» вакили Нуриддин Жабборов ўрин олди.
Майдон ўйинчилари таркибига Муҳаммад Шарипов («Сипар»), Дилшод Саломов, Умед Кузиев, Баходур Хўжаев ва Муҳаммад Афғонов («Истиқлол»), Насратшо Исмоилов, Некруз Идиев ва Амиржон Раҳимов (ЦСКА), Самандар Ризомов ва Муҳаммад Ражабов («Соро компания»), Сиёвуш Қаюмов («Амонатбанк») ҳамда Хусрав Холиқназаров («Сомон») киритилди.
Баҳодир Аҳмедов бошчилигидаги Ўзбекистон терма жамоаси ҳам бўлажак учрашувларга тайёргарлик кўрмоқда. Жамоа машғулотлари Ўзбекистон футбол ассоциациясининг терма жамоалар марказида ўтказилмоқда.
Ҳар икки жамоа ноябрь ойидаги учрашувлардан FIFA халқаро тақвими доирасида 2028 йилги футзал бўйича Осиё кубогининг саралаш босқичига тайёргарлик кўриш учун фойдаланмоқда.
