Тошкент, Ўзбекистон (UzDaily.uz) — 2026 йил 27 октябрь куни Ўзбекистон Олий Мажлиси Сенати Раиси Танзила Нарбаева мамлакатга «Марказий Осиё ва Озарбайжон ёш етакчилари» минтақавий дастури доирасида ташриф буюрган хорижий давлатлар делегациялари вакиллари билан учрашди.
Учрашувда Марказий Осиёда янги сиёсий муҳитнинг шаклланиши минтақавий ҳамкорликни мустаҳкамлаш, сиёсий мулоқотни кенгайтириш ва долзарб масалаларни биргаликда ҳал этиш учун қўшимча имкониятлар яратаётгани таъкидланди.
Ёшларни қўллаб-қувватлаш соҳасидаги Ўзбекистон давлат сиёсатига алоҳида эътибор қаратилди. Учрашув иштирокчиларига «Янги Ўзбекистон ёшлари — 2030» стратегиясининг асосий қоидалари тақдим этилди. Шунингдек, маҳаллаларда ёшлар етакчиларининг фаолияти, Олий Мажлис палаталари ҳузуридаги Ёшлар парламентларининг ёш авлод манфаатларини ифода этиш ва ҳимоя қилишдаги ўрни ҳақида маълумот берилди.
Томонлар ёшлар бандлигини таъминлаш, тадбиркорликни ривожлантириш, рақамли иқтисодиёт ва сунъий интеллект соҳаларида ҳамкорликни кенгайтириш истиқболларини ҳам муҳокама қилдилар. Устувор йўналишлар сифатида ёшларнинг билим ва касбий компетенцияларини ошириш, инновацион ташаббусларни қўллаб-қувватлаш ҳамда минтақа мамлакатларида рақамли трансформация жараёнларини жадаллаштириш белгиланди.
Бундан ташқари, хорижий делегациялар вакилларига Ўзбекистонда амалга оширилаётган конституциявий ва парламент ислоҳотлари, Сенатнинг ваколатлари ҳамда унинг қонун ижодкорлиги жараёнидаги ўрни ҳақида маълумот берилди.
Учрашув якунида минтақа мамлакатлари ёш етакчилари ўртасидаги алоқаларни мустаҳкамлаш, парламентлараро ҳамкорликни ривожлантириш ва қўшма ташаббусларни амалга ошириш муҳимлиги таъкидланди.
Мунтазам мулоқот ва тажриба алмашиш Марказий Осиё мамлакатлари ҳамда Озарбайжон ўртасидаги яхши қўшничилик муносабатларини ривожлантириш ва шерикликни кенгайтиришга салмоқли ҳисса қўшиши қайд этилди.
