Сербия Ўзбекистонда элчихона очишга тайёргарлик кўрмоқда
Тошкент, Ўзбекистон (UzDaily.uz) — Сербия Тошкентда ўз элчихонасини очишга тайёргарлик ишларини якунламоқда. Бу Ўзбекистон фуқароларига, жумладан, ишга жойлашиш билан боғлиқ Сербия визаларини расмийлаштиришни осонлаштириши кутилмоқда. Бу ҳақда икки давлат вакилларининг меҳнат миграцияси ва ишчи кучининг ҳаракатчанлиги масалалари бўйича музокаралари давомида маълум бўлди.
Ўзбекистон Миграция агентлиги директори Мухсинхожа Абдурахмонов Белградда Сербия меҳнат, бандлик, ветеранлар ишлари ва ижтимоий сиёсат вазири Милица Джурджевич-Стаменковски билан учрашди. Музокараларнинг асосий натижаларидан бири миграция ва ҳаракатчанлик соҳасида ҳукуматлараро битимни имзолаш бўйича келишувга эришилгани бўлди.
Ҳозирги вақтда Ўзбекистон фуқаролари учун Сербия визаларини расмийлаштириш Сербиянинг Остонадаги дипломатик ваколатхонаси орқали амалга оширилмоқда. Тошкентда элчихона очилганидан сўнг тегишли тартиб-таомилларни соддалаштириш режалаштирилмоқда.
Сербиянинг Ўзбекистонда дипломатик ваколатхона очиши масаласи икки давлат ташқи ишлар вазирлари Марко Джурич ва Бахтиёр Саидов томонидан ҳам муҳокама қилинди. Сербия ташқи сиёсат маҳкамаси раҳбарининг сўзларига кўра, айни пайтда Тошкентда элчихона очишга тайёргарлик ишлари якунланмоқда.
Меҳнат миграцияси бўйича музокаралар доирасида Сербия томони Ўзбекистондан Белградда бўлиб ўтадиган EXPO 2027 халқаро кўргазмаси объектларини қуриш учун мутахассисларни жалб қилишдан манфаатдор эканини билдирди.
Томонлар Сербия томонининг эҳтиёжларини инобатга олган ҳолда кадрларни дастлабки тайёрлаш ҳамда уларни кейинчалик муносиб меҳнат шароитлари яратилган иш ўринларига йўналтириш масалаларини муҳокама қилди.
Абдурахмонов меҳнат вазири билан учрашувдан сўнг Сербия Миллий бандлик хизмати директори Милан Боснич билан музокаралар ўтказди. Томонлар ҳукуматлараро битим ратификация қилинганидан кейин икки идора ўртасида меҳнат миграцияси ва ишчи кучининг ҳаракатчанлиги соҳасида ҳамкорлик тўғрисида протокол имзолашга келишиб олдилар.
Икки томонлама алоқаларни ривожлантириш масалалари 8 сентябрь куни бўлиб ўтган Ўзбекистон–Сербия бизнес-форумида ҳам муҳокама қилинди. Ўзбекистон Президенти Шавкат Мирзиёев Белградда тўлақонли элчихона очилгунга қадар махсус дипломатик ваколатхона ташкил этиш режалари борлигини маълум қилди.
Унинг сўзларига кўра, келаси ҳафтаёқ ўзбек дипломатлари икки давлат ўртасидаги ишбилармонлик алоқаларини ривожлантиришга кўмаклашиш учун Сербияга етиб бориши керак.
