Сарлавҳа: Сардор Умурзаков Стратегик ривожланиш агентлигига раҳбар бўлди

Тошкент, Ўзбекистон (UzDaily.uz) — Ўзбекистон Президенти Шавкат Мирзиёев Сардор Умурзаковни Ўзбекистон Республикаси Президенти ҳузуридаги Стратегик ривожланиш ва ислоҳотлар агентлиги директори этиб тайинлади. Бу ҳақда давлат раҳбари томонидан тегишли фармон имзоланди.

Янги тайинлов муносабати билан Сардор Умурзаков 2025 йил июль ойидан буён эгаллаб келган Президентнинг стратегик ривожланиш бўйича маслаҳатчиси лавозимини тарк этди. Алоҳида фармон билан мазкур маслаҳатчи лавозими тугатилди.

Шу вақтга қадар агентлик директори вазифасини бажариб келган Абдулла Абдуқодиров бошқа ишга ўтгани муносабати билан эгаллаб турган лавозимидан озод этилди.

Сардор Умурзаков 1977 йилда туғилган. У Тошкент давлат иқтисодиёт университети ҳамда Буюк Британиядаги Рединг университетини тамомлаган. 2019 йилдан инвестициялар ва ташқи савдо вазири лавозимида ишлаган, 2020–2022 йилларда эса бир вақтнинг ўзида Бош вазир ўринбосари вазифасини ҳам бажарган. 2022–2023 йилларда Сардор Умурзаков Ўзбекистон Президенти Администрациясига раҳбарлик қилган.

Стратегик ривожланиш ва ислоҳотлар агентлиги ўтган йилнинг ноябрь ойида Стратегик ислоҳотлар агентлигини қайта ташкил этиш орқали тузилган. Ислоҳот доирасида «мақсад — ҳаракат — натижа» тамойили асосида стратегик режалаштириш тизимини жорий этиш ҳамда Мувофиқлаштирувчи кенгаш ваколатларини кенгайтириш назарда тутилган.