Тошкент, Ўзбекистон (UzDaily.uz) — Самарқандда Саудия Арабистонига «Умра» зиёратини ноқонуний ташкил этишга уринишнинг олди олинди. Бу ҳақда Ўзбекистон Давлат хавфсизлик хизмати хабар берди.
Маълум қилинишича, 1956 йилда туғилган самарқандлик фуқаро, аввал фирибгарлик билан боғлиқ жиноят учун судланган бўлиб, тегишли ваколатларга эга бўлмаган ҳолда, Оқдарё туманида яшовчи тўрт нафар фуқарога зиёратни амалга ошириш учун сафарларини ташкил этиб беришни таклиф қилган.
Эркак сафарни ташкил этиш учун 4 800 АҚШ доллари талаб қилган. Давлат хавфсизлик хизмати ходимлари Самарқанд вилояти ички ишлар бошқармаси билан ҳамкорликда тезкор тадбир ўтказиб, уни 3 000 АҚШ доллари миқдоридаги авансни олаётган вақтида ушлаган.
Ушлаш вақтида ашёвий далиллар қайд этилган ва олиб қўйилган.
Мазкур шахсга нисбатан жиноят иши қўзғатилган. Ҳозирда тергов ҳаракатлари олиб борилмоқда.
Давлат хавфсизлик хизмати фуқароларни қонунчиликнинг шу каби бузилишлари ҳақида 1520 қисқа рақами орқали хабар беришга чақирди. Идорада мурожаат қилувчиларнинг шахси сир сақланиши кафолатланиши таъкидланган.
