Робахон Маҳмудова Ўзбекистон Олий суди раиси этиб сайланди

Тошкент, Ўзбекистон (UzDaily.uz) — Ўзбекистон Республикаси Олий Мажлиси Сенати Кенгаши Робахон Анваровна Маҳмудовани Ўзбекистон Республикаси Олий суди раиси этиб сайлади.

Масала Ўзбекистон Республикаси Конституцияси ҳамда «Ўзбекистон Республикаси Олий Мажлиси Сенати тўғрисида»ги Конституциявий қонунга мувофиқ Сенат Кенгаши йиғилишида кўриб чиқилди. Робахон Маҳмудованинг номзоди Ўзбекистон Республикаси Президенти томонидан киритилди.

Муҳокамалар якунларига кўра, Маҳмудовани судья лавозимида муддатсиз фаолият юритиш учун, шунингдек Олий суд раиси лавозимига беш йил муддатга сайлаш тўғрисида қарор қабул қилинди.

Кадрларга оид мазкур қарор Олий суд раиси Бахтиёр Исломов лавозимидан озод этилганидан кейин қабул қилинди. У 2022 йил август ойидан буён мамлакатнинг олий суд органига раҳбарлик қилиб келаётган эди.

Янги лавозимга тайинланишидан олдин Робахон Маҳмудова 2024 йил январь ойидан буён «Адолат» социал-демократик партияси раиси лавозимида ишлаб келаётган эди. Аввалроқ у мазкур партиядан 2023 йилги навбатдан ташқари президентлик сайловида номзод сифатида иштирок этган ва овоз бериш якунларига кўра сайловчилар овозларининг 4,43 фоизини қўлга киритган.