Қўқонда Малибу бошқараётган ўсмир уч нафар мактаб ўқувчи қизни уриб юборди
Тошкент, Ўзбекистон (UzDaily.uz) — Қўқонда Malibu автомобилини бошқарган вояга етмаган ҳайдовчи пиёдалар ўтиш жойида уч нафар қизчани уриб юборди. Бу ҳақда Фарғона вилояти ИИБ хабар берди.
Идора маълумотларига кўра, ҳодиса 20 май куни Амир Темур кўчасида содир бўлган. Malibu автомобили рулда бўлган вояга етмаган З. А. пиёдалар ўтиш жойидан йўлни кесиб ўтаётган 2016 йилда туғилган уч нафар қизчани уриб кетган.
Олинган тан жароҳатлари оқибатида жабрланганлардан бири шифохонада вафот этган.
Ҳодиса юзасидан Ўзбекистон Жиноят кодексининг 266-моддаси 2-қисми билан жиноят иши қўзғатилган. Ҳайдовчи қўлга олинган бўлиб, тергов ҳаракатлари олиб борилмоқда.
