Солиқ қўмитаси собиқ ўринбосари Мубин Мирзаев 8 йилга қамалди

Тошкент, Ўзбекистон (UzDaily.uz) — Шайхонтоҳур тумани жиноят ишлари бўйича суди Солиқ қўмитаси собиқ биринчи раисининг ўринбосари Мубин Мирзаевни 8 йил 2 ой муддатга озодликдан маҳрум қилиш жазосига ҳукм қилди. Суд, шунингдек, уни муайян ҳуқуқдан уч йил муддатга маҳрум этди.

1969 йилда туғилган Мирзаев Жиноят кодексининг 168-моддаси 4-қисми «а» бандида назарда тутилган — ўзлаштириш ёки растрата йўли билан жуда кўп миқдорда ўзганинг мулкини талон-торож қилиш, 205-моддаси 2-қисми «а» бандида назарда тутилган — жуда кўп миқдорда зарар етказишга сабаб бўлган мансаб ваколатини суиистеъмол қилиш, шунингдек, 208-модда — ҳокимият ҳаракатсизлигида айбдор деб топилди.

Мирзаев билан бирга иш бўйича яна саккиз нафар шахс судланди. Суд бошқа судланувчиларни ҳам Жиноят кодексининг тегишли моддалари қисми ва бандлари бўйича айбдор деб топди. Улар орасида шахсга доир маълумотлар тўғрисидаги қонунчиликни бузиш, солиқ ёки йиғимларни тўлашдан бўйин товлаш, савдо ёки хизмат кўрсатиш қоидаларини бузиш, шунингдек, ҳужжатлар, штамплар, муҳрлар ва бланкаларни тайёрлаш, қалбакилаштириш, сотиш ёки улардан фойдаланиш билан боғлиқ моддалар ҳам бор.

Уларга тўрт йилдан тўққиз йилгача муддатга озодликдан маҳрум қилиш жазоси тайинланди.

Суд ҳукмида етказилган зарарни ундириш ҳам назарда тутилган. Тайинланган жазо муддати судланувчиларга қамоққа олиш эҳтиёт чораси қўлланган кундан бошлаб ҳисобланади.

Раислик қилувчи судья томонларга ҳукм мазмунини, шунингдек, унга шикоят бериш тартиби ва муддатларини тушунтирди.

Эслатиб ўтамиз, Ўзбекистон Солиқ қўмитаси раисининг биринчи ўринбосари Мубин Мирзаев 2026 йил январь ойида «хизмат вазифаларига совуққонлик ва масъулиятсизлик билан ёндашгани» учун лавозимидан озод этилган эди.