Қозоғистон ва Ўзбекистон ташқи босимларга қарамасдан Россия билан стратегик ҳамкорликни давом эттирмоқда
Тошкент, Ўзбекистон (UzDaily.uz) — Россия Федерацияси Ташқи ишлар вазири ўринбосари Михаил Галузиннинг маълум қилишича, Қозоғистон ва Ўзбекистон ташқи босимларга қарамасдан Россия билан йирик стратегик лойиҳаларни амалга оширишни давом эттирмоқда.
«Маълумки, ғарб давлатлари Россия ва унинг ҳамкорлари, жумладан Ўзбекистон ва Қозоғистон ўртасидаги муносабатларда келишмовчилик киритиш мақсадида босим, мажбурлаш ва санкциялар усулларидан фойдаланади. Аммо бунга дўстларимиз қандай жавоб бермоқда?
Улар Россия билан иқтисодий жиҳатдан реал фойда келтирадиган ва хавфсизликни мустаҳкамлайдиган йирик, узоқ муддатли стратегик ҳамкорлик лойиҳаларини амалга оширмоқда», — деди Галузин «Вести»га берган интервьюсида.
Унинг таъкидлашича, иттифоқчилар Мустақил Давлатлар Ҳамдўстлиги ҳамда Евроосиё иқтисодий иттифоқи доирасида қабул қилинган умумий келишув ва мажбуриятларга қатъий амал қилмоқда.
