Тошкент, Ўзбекистон (UzDaily.uz) — Қозоғистон ва Ўзбекистон икки мамлакат ўртасида рухсат этилган авиақатновлар сонини оширишга келишиб олди. Олмаота – Тошкент ва Остона – Тошкент йўналишларининг ҳар бирида парвозлар сони ҳафтасига 60 тагача етказилиши мумкин.
Бундай келишув Тошкентда бўлиб ўтган авиация соҳасидаги икки томонлама музокаралар давомида эришилди. Музокаралар «Хитой – Марказий Осиё» (C5+1) фуқаро авиацияси соҳасидаги ҳамкорлик бўйича ишчи гуруҳ конференцияси доирасида ўтказилди. Бу ҳақда Қозоғистон Транспорт вазирлиги матбуот хизмати хабар берди.
Қозоғистон делегациясига вазирликнинг Фуқаро авиацияси қўмитаси раиси Салтанат Томпиева раҳбарлик қилди. Ўзбекистон томонидан эса Транспорт вазирлиги Ҳаво транспорти бошқармаси бошлиғи Жамолиддин Назаров иштирок этди.
Музокаралар иштирокчилари авиақатновларни кенгайтириш, мунтазам рейслар частотасини ошириш ҳамда икки мамлакатнинг йирик шаҳарлари ўртасидаги авиапарвозлардан фойдаланиш имкониятларини яхшилаш масалаларини муҳокама қилди.
Олмаота – Тошкент ва Остона – Тошкент йўналишларидан ташқари, томонлар Қозоғистон ва Ўзбекистон ўртасидаги бошқа йўналишларда ҳам рухсат этилган парвозлар частотасини оширишга келишиб олди. Амалдаги ҳафтасига 14 та рейс ўрнига уларнинг сони 20 тага етказилади.
Қозоғистон Транспорт вазирлигида таъкидланишича, эришилган келишувларнинг амалга оширилиши энг талаб юқори бўлган йўналишларда таклиф этиладиган авиачипталар ўринлари сонини кўпайтириш имконини беради.
