«Пахтакор» Абдумажидовни Францияга ижарага беришдан бош тортди

Тошкент, Ўзбекистон (UzDaily.uz) — Тошкентнинг «Пахтакор» футбол клуби ҳимоячи Муҳаммадрасул Абдумажидовни сотиб олиш ҳуқуқи билан Франция клубига ижарага бериш бўйича таклифни рад этди. Клуб маълум қилишича, хорижий жамоадан футболчининг трансфери бўйича расмий таклиф хати келиб тушмаган.

Клуб маълумотига кўра, таклиф фақат футболчининг агенти орқали етказилган. «Пахтакор»да мазкур таклиф жамоани қониқтирмагани таъкидланди. Шу билан бирга, клуб ўз футболчилари бўйича манфаатли таклифларни кўриб чиқишга тайёр эканини билдирди, чунки ҳар бир футболчининг муайян трансфер қиймати мавжуд.

Рад этишнинг яна бир сабаби Ўзбекистонда трансфер ойнасининг ёпилгани бўлди. Айни пайтда «Пахтакор» мавсумнинг муҳим босқичида турибди ва футболчига тезкор равишда ўринбосар топиш имкониятига эга эмас.

Клубда шунингдек, «Пахтакор» мураббийлар штаби олдига ҳар мавсум жиддий вазифалар қўйилиши ва жорий йил ҳам бундан мустасно эмаслиги таъкидланди. Футболчиларнинг жамоадан кетиши ва трансферлар бўйича қарорлар белгиланган мақсадлар ҳамда жамоа манфаатларини инобатга олган ҳолда қабул қилинади.

Олдинда Тошкент клубини ОФК Элит Чемпионлар лигасида иштирок этиш кутиб турибди. Унда жамоа олдига муносиб иштирок этиш вазифаси қўйилган. Шу муносабат билан «Пахтакор»да ҳозирги вақтда устувор вазифа таркибни кучайтириш, уни заифлаштириш эмаслиги билдирилди.

Клуб вакили таъкидлашича, агар таклиф эртароқ келиб тушганида, уни батафсил кўриб чиқиш мумкин эди. Ёзги трансфер ойнаси даврида «Пахтакор» аллақачон бошқа жамоаларга ўтган икки нафар марказий ҳимоячи билан хайрлашган.

Шу муносабат билан клуб Абдумажидов бўйича таклифни кўриб чиқиш имконияти фақат қишки трансфер ойнаси даврида пайдо бўлишини маълум қилди.