«Ўзбекнефтегаз» ва "Baker Hughes" янги лойиҳаларни муҳокама қилишди

Тошкент, Ўзбекистон (UzDaily.uz) — Тошкентда "Ўзбекистон нефть ва гази — OGU 2026" 28-халқаро кўргазма ва конференцияси доирасида «Ўзбекнефтегаз» раҳбарияти ва Американинг Бакер Ҳугҳес компанияси делегацияси ўртасида музокаралар бўлиб ўтди.

Мулоқотда томонлар кўп йиллик ўзаро ҳамкорликни янада ривожлантириш масалаларини муҳокама қилдилар. Хусусан, газтурбина ускуналарини етказиб бериш, сервис хизматларини кўрсатиш ва ишлаб чиқариш жараёнларига замонавий технологик ечимларни жорий этиш бўйича амалга оширилаётган ишлар қайд этилди.

Музокаралар давомида компрессор инфратузилмасини ривожлантириш, газтурбина ускуналарини модернизация қилиш, уларнинг ишончли ва самарали эксплуатациясини таъминлаш, шунингдек, рақамли технологиялар, масофавий мониторинг ва диагностика тизимларини жорий этиш истиқболлари юзасидан фикр алмашилди.

Абдуғани Сангинов “Бакер Ҳугҳес” компаниясининг нефть-газ соҳасидаги илғор технологиялари ва халқаро тажрибаси «Ўзбекнефтгаз» АЖда амалга оширилаётган трансформация жараёнлари учун муҳим аҳамият касб этишини таъкидлаб, ҳамкорликни янги босқичга олиб чиқишдан манфаатдор эканини билдирди.

Учрашув якунида томонлар ўзаро манфаатли ҳамкорликни янада кенгайтириш ва истиқболли лойиҳаларни амалга ошириш бўйича амалий ишларни давом эттиришга келишиб олдилар.