Ўзбекистонликлар Қирғизистонда 15 кунгача рўйхатдан ўтмай юради
Тошкент, Ўзбекистон (UzDaily.uz) — Ўзбекистон фуқаролари Қирғизистон ҳудудида мажбурий рўйхатдан ўтмасдан 15 суткагача бўлишлари мумкин бўлади. Ҳозирги беш кунлик муддат ўрнига янги тартиб жорий этилади. Тегишли протокол Ўзбекистон Президенти Шавкат Мирзиёев ва Қирғизистон Президенти Садир Жапаров ўртасидаги музокаралар якунлари бўйича 30 июль куни имзоланди.
Ҳужжат Ўзбекистон ва Қирғизистон ҳукуматлари ўртасида 2006 йил 3 октябрда имзоланган фуқароларнинг ўзаро сафарлари тўғрисидаги Битимга ўзгартишлар киритишни назарда тутади. Имзоланган ҳужжатларни алмашиш маросими икки давлат раҳбарлари иштирокида бўлиб ўтди.
Ўзбекистон Ташқи ишлар вазирлигида таъкидланганидек, протокол қўшни давлат ҳудудида бўлиш қоидаларини соддалаштириш орқали фуқароларнинг ўзаро сафарлари тартибини янада либераллаштиришга қаратилган.
Ҳужжатга кўра, Ўзбекистон ва Қирғизистон фуқаролари давлат чегарасини кесиб ўтган пайтдан бошлаб 15 сутка давомида қабул қилувчи томоннинг ваколатли органларида доимий ёки вақтинчалик рўйхатдан ўтиш мажбуриятидан озод қилинади.
Ҳозирда Қирғизистон қонунчилиги Ўзбекистон фуқароларини мамлакатга кирганидан кейин беш сутка ичида ички ишлар органларида мажбурий рўйхатдан ўтказишни назарда тутади. Протокол кучга кирганидан сўнг ушбу муддат 15 кунга узайтирилади.
Ўзгартишлар туризм, савдо ва чегараолди ҳамкорлигини ривожлантириш, шунингдек, икки давлат ўртасидаги гуманитар ва ишбилармонлик алоқаларини мустаҳкамлашга хизмат қилиши кутилмоқда.
