Ўзбекистонлик велоспортчилар Осиё чемпионатида муваффақиятли старт олди

Тошкент, Ўзбекистон (UzDaily.uz) — Малайзияда ёшлар ва катталар ўртасидаги Осиё трек велоспорти чемпионати давом этмоқда. Мусобақанинг илк кунидаёқ Ўзбекистон терма жамоаси икки олтин ва бир бронза медални қўлга киритиб, ўзини муносиб намоён қилди.

Эркаклар ўртасидаги скретч пойгасида Дмитрий Бочаров ажойиб чиқиш қилди. Ўзбекистонлик спортчи Япониялик Казушига Кубоку – амалдаги жаҳон чемпионини ортда қолдириб, олтин медални қўлга киритди ва рақибларига ҳеч қандай имконият қолдирмади.

Аёллар мусобақасида эса Самира Исмоилова ўз маҳорат ва тажрибасини намоён этди. У омниум йўналишида чемпион бўлди, шунингдек, очколи пойгада жамоа ҳисобига бронза медалини ҳам қўшди.

Эслатиб ўтамиз, Осиё чемпионати 27 февралгача давом этади, ва Ўзбекистон терма жамоасини олдинда яна кўплаб ғалабалар кутиб турибди.