Ўзбекистонда янги ўқув йили бошланди

Тошкент, Ўзбекистон (UzDaily.uz) — Бугун, 2 сентябрь куни, Ўзбекистондаги барча умумтаълим муассасаларида 2026/2027 ўқув йили бошланди. Бу йил 795 минг нафардан зиёд бола илк бор мактаб остонасидан ҳатлади. Янги ўқув йилининг бошланиши Ўзбекистон давлат мустақиллигининг 35 йиллиги нишонланаётган даврга тўғри келди.

Анъанавий «Президент совғаси» акцияси доирасида биринчи синфга қабул қилинган ўқувчиларга 12 турдаги ўқув қуролларидан иборат тўпламлар тарқатилади.

Янги ўқув йилида Ўзбекистонда 10 225 та умумтаълим мактаби фаолият юритмоқда. Уларда 550 минг нафардан зиёд ўқитувчи 6,7 миллиондан ортиқ ўқувчига таълим ва тарбия беради.

Мактабгача ва мактаб таълими вазири Эъзоза Каримова ўқувчилар, педагоглар ва ота-оналарни Билимлар куни ҳамда янги ўқув йили бошланиши билан табриклади.

Вазир ўз мурожаатида «Биринчи қўнғироқ» садолари остида илк бор мактаб остонасидан ҳатлаган болаларни, шунингдек, уларнинг ота-оналарини алоҳида табриклади.

Каримова таълим тизимини ривожлантириш, жамиятда ўқитувчиларнинг роли ва нуфузини ошириш, болаларнинг замонавий билим ва касбий кўникмаларни эгаллаши учун зарур шароитларни яратишга алоҳида эътибор қаратилаётганини таъкидлади. Унинг сўзларига кўра, мактаблар янгиланмоқда, таълим жараёнига замонавий ёндашувлар жорий этилмоқда. Бу эса ёш авлод учун янги имкониятларни очмоқда.

Вазир, шунингдек, ўзбекистонлик мактаб ўқувчиларининг халқаро фан олимпиадалари, танловлар, спорт ва ижодий мусобақаларда эришаётган ютуқларини таъкидлади. У битирувчиларнинг Ўзбекистон ва хориждаги етакчи олий таълим муассасаларида ўқишни давом эттириш имкониятларига ҳам алоҳида тўхталди.

Каримова янги ўқув йилида педагогларнинг фидокорона меҳнати, ота-оналарнинг қўллаб-қувватлаши ва ўқувчиларнинг билим олишга бўлган интилиши янги ютуқлар учун асос бўлишига ишонч билдирди.

У мактаб ўқувчилари, ўқитувчилар ва ота-оналарга мустаҳкам соғлик, оилавий фаровонлик, ўқиш ва меҳнат фаолиятида муваффақиятлар тилаб, янги ўқув йили муваффақиятли ва баракали келишини билдирди.