Тошкент, Ўзбекистон (UzDaily.uz) — Ўзбекистонда йўловчи ташиш инфратузилмасини ривожлантиришни солиқ имтиёзлари, имтиёзли кредитлар, субсидиялар ва давлат-хусусий шериклик (ДХШ) механизмлари орқали рағбатлантириш режалаштирилмоқда. Бу чоралар 2030 йилгача маҳаллий йўловчи ташиш соҳасини ривожлантириш стратегияси тўғрисидаги президент қарори лойиҳасида назарда тутилган.
Лойиҳага кўра, 2027 йил 1 январдан 2030 йил 1 январгача йўловчиларга хизмат кўрсатувчи темир йўл вокзаллари, автовокзаллар, автостанциялар ва маҳаллий аэропортларни юридик шахсларнинг мол-мулк солиғи ҳамда ер солиғидан озод этиш таклиф қилинмоқда.
Бундан ташқари, 2027 йил 31 декабрга қадар Ўзбекистонга Евро-5 ёки ундан юқори экологик стандартга мос келадиган, M3 тоифасининг III синфига кирувчи янги автобуслар ва электробуслар олиб кирилганда, утилизация йиғими учун ноль ставка белгилаш таклиф этилмоқда.
Автостанцияларда тижорат фаолияти
Лойиҳада автостанциялар ҳудудининг 20 фоизигача бўлган қисмидан тижорат объектлари ва хизматларини жойлаштириш учун фойдаланиш имконияти назарда тутилган. Улар қаторига қувватлаш станциялари, умумий овқатланиш корхоналари, меҳмонхоналар, техник хизмат кўрсатиш шохобчалари, автомойкалар ва дўконлар киради. Бунда автостанциянинг тоифаси ва хавфсизлик талаблари ҳисобга олиниши керак.
2027 йил 1 июлга қадар Транспорт вазирлиги вокзаллар, аэропортлар ва автовокзалларда аутсорсингга ёки давлат-хусусий шериклик асосида бошқарувга бериш мумкин бўлган хизматларни белгилайдиган манзилли дастурни тасдиқлаши лозим. Дастурда ушбу объектларга туташ ер участкаларидан фойдаланиш масалалари ҳам тартибга солинади.
Ташувчиларга имтиёзли кредитлар ва субсидиялар
Марказий банкка тижорат банклари орқали имтиёзли узоқ муддатли кредитлар бериш механизмини ташкил этиш топширилган. Маблағлар автовокзаллар ва автостанцияларни қуриш, реконструкция қилиш ва модернизациялаш, шунингдек, шаҳар, шаҳар атрофи ва шаҳарлараро йўналишларда йўловчи ташиш учун янги микроавтобуслар сотиб олишга йўналтирилади.
Уч ой муддатда Транспорт вазирлиги Иқтисодиёт ва молия вазирлиги билан биргаликда зарар билан ишлаётган шаҳар атрофи ҳамда вилоят ичидаги шаҳарлараро йўналишларда хизмат кўрсатувчи ташувчиларни субсидиялаш тўғрисидаги Вазирлар Маҳкамаси қарори лойиҳасини тайёрлаши керак.
Объектлар ДХШ модели асосида бошқарувга берилади
Стратегия лойиҳасида давлат-хусусий шериклик асосида бошқарувга берилган транспорт объектлари сонини 2025 йилдаги биттадан 2030 йилга келиб саккizтага етказиш режалаштирилган. Режага мувофиқ, 2027 йилда иккита, 2028 йилда бешта ва 2029 йилда еттита объект бошқарувга берилиши керак.
Рўйхатга Тошкент ва Бухородаги янги аэропортлар, Наманган ва Урганч аэропортлари, шунингдек, «Тошкент-Шимолий», Самарқанд ва Қўқон темир йўл вокзаллари киритилган.
Инвестициялар ҳажми 4,57 миллиард долларга баҳоланмоқда
Стратегияда кўзда тутилган капитал қўйилмаларнинг умумий ҳажми дастлабки ҳисоб-китобларга кўра, 4 574,3 миллион долларни ташкил этади. Ушбу маблағнинг 2 229,1 миллион доллари давлат-хусусий шериклик лойиҳалари доирасидаги хусусий шериклар, 1 254,5 миллион доллари давлат шериклари ва 477,5 миллион доллари ташаббускор тадбиркорлар ҳиссасига тўғри келади.
58 та автовокзал ва автостанцияни қуриш ҳамда реконструкция қилиш тадбиркорлар маблағлари ҳисобидан молиялаштирилиши режалаштирилган.
Ҳужжатда келтирилган ҳисоб-китоблар дастлабки экани таъкидланган. Молиялаштириш ҳажмлари тегишли лойиҳаларнинг техник-иқтисодий асослари ишлаб чиқилганидан кейин аниқлаштирилади.
