Тошкент, Ўзбекистон (UzDaily.uz) — Ўзбекистон Марказий божхона лабораториясида синтетик гиёҳванд моддалар ва янги психоактив моддаларни аниқлаш, идентификация қилиш ҳамда таҳлил этишнинг замонавий усулларига бағишланган халқаро семинар-тренинг бўлиб ўтмоқда. Тадбир БМТнинг Наркотиклар ва жиноятчилик бўйича бошқармаси ҳамда хитойлик мутахассислар ҳамкорлигида ташкил этилган.
Семинарда Ўзбекистон, Хитой, Қозоғистон, Қирғизистон, Тожикистон ва Туркманистоннинг эксперт муассасалари вакиллари иштирок этмоқда.
Тадбирнинг асосий мақсади мутахассисларни янги гиёҳванд моддаларни аниқлашнинг замонавий илмий-амалий ёндашувлари билан таништириш, лаборатория таҳлили усулларини такомиллаштириш ва экспертларнинг малакасини оширишдан иборат.
Семинарнинг назарий қисмида хитойлик мутахассислар янги психоактив моддаларнинг хусусиятлари, жумладан, синтетик каннабиноидлар, катинонлар ва синтетик опиоидлар ҳақида маърузалар тақдим этди. Иштирокчилар бундай бирикмаларни идентификация қилиш усуллари ва замонавий таҳлил технологияларини ҳам кўриб чиқди.
Иштирокчи мамлакатлар вакиллари ўзаро тажриба алмашиб, синтетик гиёҳванд моддалар тарқалишининг тенденцияларини ҳамда лабораторияларда бундай моддаларни текшириш жараёнида юзага келадиган муаммоларни муҳокама қилди.
Семинарнинг иккинчи кунида амалий машғулотлар ўтказилиши режалаштирилган. Улар Марказий божхона лабораториясининг таҳлилий ускуналари ва техник инфратузилмасидан фойдаланган ҳолда ташкил этилади. Экспертлар номаълум намуналарни текшириб, олинган натижаларни баҳолайди.
Тадбир Ўзбекистон Президентининг 2026 йил 27 августдаги ПФ-174-сон фармонида белгиланган вазифаларни бажариш билан ҳам боғлиқ.
Ҳужжатда божхона экспертизасини такомиллаштириш, янги гиёҳванд моддаларни аниқлаш учун масс-спектрометрия технологияларини жорий этиш ва минтақавий тажриба алмашинувини ривожлантириш назарда тутилган.
Бундан ташқари, семинар суд-экспертиза фаолиятида илмий асосланган усуллардан фойдаланишни кенгайтириш ва гиёҳванд моддаларни текширишнинг замонавий технологияларини ўзлаштиришга қаратилган.
