Тошкент, Ўзбекистон (UzDaily.uz) — Ўзбекистонда жазони ижро этиш муассасаларида узоқ муддатли учрашувлар, масофавий видеомулоқотлар ва телефон орқали суҳбатлар учун янги тарифларни белгилаш таклиф этилмоқда. Тегишли норматив-ҳуқуқий ҳужжат лойиҳаси жамоатчилик муҳокамасига қўйилди.
Лойиҳага кўра, узоқ муддатли учрашув хоналаридан фойдаланиш нархи уларнинг сиғимига қараб белгиланади ва тўлов амалга оширилаётган кундаги базавий ҳисоблаш миқдори (БҲМ) асосида ҳисобланади. Хона бир суткадан кам вақт фойдаланилган тақдирда ҳам тўлов тўлиқ бир кун учун ундирилади.
Қуйидаги кунлик тарифларни жорий этиш таклиф қилинмоқда: икки ўринли хона учун БҲМнинг 20 фоизи, уч ўринли хона учун 25 фоизи ва тўрт ўринли хона учун 30 фоизи.
Масофавий видеомулоқотнинг ҳар бир дақиқаси учун БҲМнинг 0,5 фоизи, телефон орқали суҳбатнинг ҳар бир дақиқаси учун эса 0,1 фоизи миқдорида ҳақ ундириш режалаштирилмоқда.
Лойиҳада узоқ муддатли учрашув хоналаридан фойдаланганлик учун ҳақ тўлашдан айрим тоифадаги шахсларни озод қилиш ҳам назарда тутилган. Улар қаторига маҳкумларнинг ўзлари, бошқа вояга етган шахслар ҳамроҳлигисиз келган 16 ёшгача бўлган болалар, I гуруҳ ногиронлиги бўлган шахслар, шунингдек, Ижтимоий реестрга киритилган оилалар аъзолари киради.
Бироқ ушбу имтиёзлар масофавий видеомулоқотлар ва телефон орқали суҳбатларга татбиқ этилмайди.
Агар хизмат техник носозликлар, алоқа тармоқлари, Qal’a тизимидаги муаммолар ёки фойдаланувчига боғлиқ бўлмаган бошқа ҳолатлар сабабли тўлиқ кўрсатилмаса ёки умуман тақдим этилмаса, кўрсатилмаган хизмат қисми учун ҳақ ундирилмайди.
Амалга ошмаган видеомулоқот ёки телефон суҳбати учун маҳкумнинг ҳисобидан ечилган маблағлар унинг шахсий ҳисобварағига қайтарилиши керак.
Агар учрашув ёки суҳбат фойдаланувчининг айби билан муддатидан олдин тўхтатилса, амалда фойдаланилган вақт учун тўланган маблағ қайтарилмайди.
