Ўзбекистонда ғаллазорларда 744 та ёнғин ҳолати аниқланди

Тошкент, Ўзбекистон (UzDaily.uz) — 2026 йил бошидан буён Ўзбекистонда буғдой ўримидан бўшаган ер майдонларида 744 та ёнғин ҳолати аниқланди. Бу ҳақда Экология қўмитаси хабар қилди.

Идора маълумотига кўра, ҳосил йиғиб олингандан кейин далаларни ёқиш билан боғлиқ қоидабузарликларни аниқлаш ишлари аэрокосмик маълумотлардан фойдаланган ҳолда амалга оширилмоқда. Бундай ҳолатларнинг олдини олиш мақсадида ҳудудий бошқармалар томонидан фермер хўжаликларига 7 760 та огоҳлантирув хати юборилган.

Назорат тадбирлари Экополициянинг ҳудудий бўлинмалари томонидан ўтказилди. «Узбеккосмос» агентлиги томонидан тайёрланган космик суратларни қайта ишлаш ва таҳлил қилиш натижасида донли экинлар йиғиб олинган қишлоқ хўжалиги ерларида ёнғин содир бўлгани аниқланган.

Ҳар бир аниқланган ҳолат бўйича давлат инспекторлари жойига чиққан ҳолда текширув ўтказган. Тўпланган материаллар кўриб чиқилиши якунлари бўйича 172 нафар қоидабузар маъмурий жавобгарликка тортилди. Тайинланган жарималарнинг умумий суммаси 212,5 миллион сўмни ташкил этди.

Шунингдек, аниқланган қоидабузарликлар натижасида атроф-муҳитга етказилган зарар 652,3 миллион сўмга баҳоланди.

Экология қўмитасида маълум қилишларича, ғўзапоя, қуруқ барглар, шох-шаббалар, бошқа ўсимлик қолдиқлари, шунингдек, қурилиш чиқиндиларини далалар ва аҳоли пунктларида ёқишнинг олдини олиш бўйича профилактик ва назорат тадбирлари давомида жами 9 821 та қоидабузарлик аниқланган.

Барча ҳолатлар бўйича белгиланган тартибда тегишли маъмурий материаллар расмийлаштирилган.