Ўзбекистонда беш ойда 146 мингдан ортиқ автомобиль сотилди

Тошкент, Ўзбекистон (UzDaily.uz) — 2026 йилнинг дастлабки беш ойи давомида Ўзбекистон автосаноат корхоналари жами 146 361 та автомобиль сотди. Бу ҳақда UzAutoSanoat ассоциацияси январ–май даври учун эълон қилинган статистик маълумотларда хабар берди.

Бозорда энг йирик иштирокчи сифатида UzAuto Motors етакчиликни сақлаб қолмоқда. Компания ушбу даврда 69 001 та автомобиль сотган бўлиб, бу умумий сотув ҳажмининг 47,1 фоизини ташкил этади.

Иккинчи ўринда UzAuto Khorezm турибди. Корхона 45 756 та автомобиль сотиб, бозорнинг 31,3 фоиз улушини эгаллаган.

Учинчи ўрин ADM Jizzakh ҳиссасига тўғри келди. Ушбу ишлаб чиқарувчи 17 417 та автомобиль сотиб, 11,9 фоиз улушни қайд этган.

BYD Uzbekistan Factory 13 700 та автомобилни сотган бўлиб, 9,4 фоизлик улушга эга бўлди. Samarqand Avtomobil Zavodi 386 та (0,3 фоиз), Asaka Motors эса 101 та (0,1 фоиз) автомобиль сотган.

Сотувлар таркибида B тоифали седанлар бозорнинг асосий қисмини эгаллаб, 35,3 фоизни ташкил этди. Енгил тижорат автомобиллари 31,4 фоиз, SUV-B тоифали йўлтанламаслар 21,5 фоиз, SUV-C кроссоверлар 6,8 фоиз улушга эга бўлди. C ва D синф седанлари мос равишда 2,8 ва 1,2 фоизни ташкил этди.

Брендлар кесимида Chevrolet 114 757 та сотилган автомобиль билан етакчи бўлиб қолмоқда. Кейинги ўринларда BYD (13 700), Kia (9 945), Chery (3 795) ва Haval (3 580) жойлашган. SamAuto 275 та, Foton 111 та, Hyundai эса 101 та автомобил сотган.

Энг оммабоп моделлар рейтингида Cobalt 35 245 та натижа билан биринчи ўринни эгаллаган. Кейин Damas 29 743 та ва Tracker 16 924 та кўрсаткич билан келади. Биринчи бешликка Onix (16 469) ва Labo (15 486) ҳам кирган. Шунингдек, оммабоп моделлар қаторида Kia Sonet (8 026), BYD Song Plus DM-i Uzpride (4 643), BYD Yuan-Up (3 606) ва Chazor Champion (3 018) қайд этилган.