Нижнекамскда Ўзбекистоннинг саккиз нафар фуқароси ҳалок бўлди
Тошкент, Ўзбекистон (UzDaily.uz) — 10 август куни эрталаб Россиянинг Татарстан Республикаси Нижнекамск шаҳридаги қатор объектларга учувчисиз учиш аппаратлари ҳужуми оқибатида Ўзбекистоннинг саккиз нафар фуқароси ҳалок бўлди. Яна бир неча нафар Ўзбекистон фуқароси турли даражадаги жароҳатлар олган ва шифохонага ётқизилган. Бу ҳақда Ўзбекистон Фавқулодда вазиятлар вазирлиги хабар берди.
Фавқулодда вазиятлар вазирлигининг дастлабки маълумотларига кўра, ҳалок бўлган Ўзбекистон фуқаролари Нижнекамскдаги қурилиш корхоналаридан бирида қурувчи бўлиб ишлаган.
Ўзбекистон Президенти Шавкат Мирзиёев топшириғига кўра, Вазирлар Маҳкамаси Бош вазир ўринбосари Очилбек Раматов раҳбарлигида ҳукумат комиссиясини тузди. Комиссияга жабрланган фуқароларни бориб кўриш ва уларга зарур ёрдам кўрсатиш, ҳалок бўлганларнинг жасадларини махсус авиарейс орқали ватанга олиб келишни ташкил этиш ҳамда уларнинг оилаларига ҳар томонлама ёрдам кўрсатиш вазифаси юклатилди.
Россияга Фавқулодда вазиятлар вазирлиги, Ташқи ишлар вазирлиги, Соғлиқни сақлаш вазирлиги, Миграция агентлиги ва бошқа масъул идоралар вакилларидан иборат махсус ишчи гуруҳ юборилди. Ўзбекистоннинг Қозон шаҳридаги Бош консулхонаси ва Миграция агентлиги вакиллари воқеа жойига аллақачон етиб борган ва Россиянинг ваколатли органлари билан ҳаракатларни мувофиқлаштирмоқда.
Фавқулодда вазиятлар вазирлиги ҳозирда жабрланганларга ёрдам кўрсатиш ҳамда ҳалок бўлган Ўзбекистон фуқароларини ватанга қайтаришни ташкил этиш бўйича зарур чоралар кўрилаётганини маълум қилди.
