Ўзбекистон ва Ester Cosmetics косметика маҳсулотлари ишлаб чиқаришни муҳокама қилишди
Тошкент, Ўзбекистон (UzDaily.uz) — Тиббиёт ва фармацевтика тармоғини ривожлантириш агентлиги директори Абдулла Азизов Жанубий Кореянинг Инчхон шаҳрида жойлашган «Ester Cosmetics» компаниясининг ишлаб чиқариш корхонасида бўлди.
Компания президенти Парк Кванг Жаэ билан ўтказилган учрашувда Ўзбекистонда талаб юқори бўлган косметика маҳсулотларини инвестиция киритиш ҳамда шартнома (OEM/ODM) асосида ишлаб чиқаришни йўлга қўйиш масалалари муҳокама қилинди.
Шунингдек, делегация корхонанинг замонавий ишлаб чиқариш қувватлари, маҳсулот сифати назорати ва ишлаб чиқариш жараёнлари билан танишди.
Учрашув якунида мазкур йўналишдаги ҳамкорликни амалий босқичга олиб чиқиш юзасидан кейинги қадамлар белгилаб олинди.
«Ester Cosmetics» 2010 йилда ташкил этилган бўлиб, тери парвариши ва декоратив косметика маҳсулотларини OEM/ODM асосида ишлаб чиқаради. Компаниянинг йиллик ишлаб чиқариш қуввати 50 миллион дона косметика маҳсулотини ташкил этади.
