Тошкент, Ўзбекистон (UzDaily.uz) — Ўзбекистон Президенти Шавкат Мирзиёев 2026 йил 10 ноябрда инсон қадрини юксалтиришга қаратилган миллий дастурларни амалга ошириш чора-тадбирлари тўғрисидаги фармонни имзолади. Ҳужжат таълим, соғлиқни сақлаш ва иқтисодий ривожланиш соҳаларидаги устувор йўналишларни белгилайди.
Фармонда асосий мақсадлари билим ва кўникмаларни тараққиётнинг бош капиталига айлантириш, аҳоли учун соғлом ва узоқ умр кўриш шароитларини таъминлаш, шунингдек, юқори технологиялар ва меҳнат унумдорлигига асосланган иқтисодиётни ривожлантиришдан иборат бўлган миллий дастурларни амалга ошириш назарда тутилган.
Устувор йўналишлардан бири таълим олиш имкониятларини кенгайтириш бўлади. Жумладан, олти ёшли болаларни мактабга қабул қилишдан олдин тайёрлов гуруҳлари билан тўлиқ қамраб олиш режалаштирилган.
Шунингдек, нодавлат мактабгача таълим ташкилотларини ташкил этиш учун амалдаги имтиёзларни сақлаб қолиш ва уларнинг самарадорлигини баҳолаш кўзда тутилган.
Барча умумтаълим мактабларини босқичма-босқич таълим сифати баҳоланадиган халқаро дастурлар билан қамраб олиш режалаштирилмоқда.
Олий таълим соҳасида эса камида 10 та таълим ташкилотини халқаро рейтинглардаги дунёнинг энг яхши 1 000 та олий таълим муассасаси қаторига киритиш вазифаси белгиланган.
Яна бир мақсад — 10 миллион нафар ёшни рақамли индустрияга жалб этиш ва келажак касбларини эгаллашига кўмаклашишдан иборат.
