Тошкент, Ўзбекистон (UzDaily.uz) — Ўзбекистон Миграция агентлиги раҳбари Мухсинхўжа Абдураҳмонов Японияда ишлаш учун мутахассисларни иш берувчиларнинг аниқ эҳтиёжларини инобатга олган ҳолда тайёрлашни таклиф қилди. Бу ҳақда Ўзбекистон Миграция агентлиги хабар берди.
Таклиф Японияда KEIDANREN бизнес федерацияси вакиллари ҳамда етакчи япон компаниялари иштирокида ўтказилган давра суҳбатида билдирилди.
Унга кўра, япон иш берувчилари талаб юқори бўлган касблар ва малака талабларини белгилаш, ўқув дастурларини ишлаб чиқиш, шунингдек, номзодларни баҳолаш жараёнида иштирок этиши мумкин.
Япония билан ҳамкорлик доирасида Ангрен шаҳрида Proud Partners компанияси билан биргаликда Uzbekistan Proud Academy фаолият юритмоқда. У ерда 140 нафардан ортиқ ҳайдовчи бепул тил ва касбий тайёргарликдан ўтмоқда.
Тошкент шаҳрида Onodera User Run ва Willer Express компаниялари билан ҳамкорликда ҳайдовчилик, парваришлаш ва умумий овқатланиш йўналишлари бўйича мутахассислар тайёрлаш дастурлари амалга оширилмоқда.
Қарши шаҳрида Orion Computer Co., Ltd. компанияси билан ҳамкорликда япон тили синфи очилди. Кейинчалик қурилиш соҳаси учун мутахассислар тайёрлашни ташкил этиш режалаштирилмоқда.
Ўзбекистоннинг 200 нафардан ортиқ фуқароси Shimizu Corporation объектларида меҳнат қилмоқда. Onodera User Run, Proud Partners ва Orion Computer Co., Ltd. иштирокидаги лойиҳалар доирасида камида 576 та иш ўрни яратилган.
«Биз учун асосий кўрсаткич нафақат ишлаш учун юборилган фуқаролар сони, балки уларнинг тайёргарлик сифати, шартнома шартларига риоя қилиниши, бандлик барқарорлиги ва касбий ўсишидир», — деди Мухсинхўжа Абдураҳмонов.
KEIDANREN — Япониянинг мамлакатдаги етакчи компаниялар ва тармоқ бирлашмаларини бирлаштирувчи бизнес федерацияси.
