Тошкент, Ўзбекистон (UzDaily.uz) — Ўзбекистон тоғ-кон саноати ва геология вазирининг биринчи ўринбосари Феруза Ҳамидова 15 сентябрь куни Британиянинг AREMCA компанияси вакиллари билан учрашув ўтказди. Томонлар ҳамкорлик истиқболлари, геология ва тоғ-кон саноатига замонавий технологияларни жорий этиш масалаларини муҳокама қилди. Бу ҳақда Ўзбекистон Тоғ-кон саноати ва геология вазирлиги хабар берди.
Учрашув давомида AREMCA вакиллари компаниянинг Марказий Осиё мамлакатларида амалга оширилаётган лойиҳаларини тақдим этди. Геологик маълумотларни таҳлил қилиш, истиқболли участкаларни аниқлаш ва кон ишлари самарадорлигини оширишда сунъий интеллектдан фойдаланиш имкониятларига алоҳида эътибор қаратилди.
Вазирлик вакиллари Ўзбекистонда ер қаъридан фойдаланиш ҳуқуқини аукцион орқали тақдим этиш тартиби, тегишли онлайн тизимлар ҳамда қонунчиликдаги янги нормалар ҳақида маълумот берди.
Музокаралар давомида томонлар келгусидаги ҳамкорлик истиқболлари, илғор технологияларни жорий этиш ва малакали мутахассисларни тайёрлаш масалалари юзасидан ҳам фикр алмашди.
