Ўзбекистонда давлат харидлари устидан назорат кучайтирилади

Тошкент, Ўзбекистон (UzDaily.uz) — Ўзбекистон Олий Мажлиси Қонунчилик палатаси давлат харидлари тизимини янада такомиллаштиришга қаратилган қонун лойиҳасини биринчи ўқишда қабул қилди. Ҳужжат харид жараёнларининг шаффофлигини ошириш, давлат буюртмачиларининг ҳисобдорлигини кучайтириш ва назорат механизмларини такомиллаштиришга қаратилган.

Таклиф этилаётган чоралардан бири амалга оширилган товарлар ва кўрсатилган хизматлар ҳақидаги маълумотларни ҳудудлар кесимида мунтазам равишда эълон қилиб боришдан иборат. Бу маълумотлар турли ҳудудларда давлат харидларининг ҳолатини баҳолаш, энг кўп талаб қилинаётган товар ва хизмат турларини аниқлаш ҳамда харид жараёнларининг очиқлигини ошириш имконини беради.

Қонун лойиҳасида бюджет маблағларидан фойдаланиш устидан парламент назоратини кучайтириш ҳам назарда тутилган. Давлат буюртмачилари томонидан амалга оширилган давлат харидлари натижаларини Давлат бюджети ижроси тўғрисидаги ҳисоботларга киритиш таклиф этилмоқда.

Бундай ҳисоботларда тўғридан-тўғри шартномалар асосида амалга оширилган харидлар ҳақидаги маълумотлар ҳам алоҳида акс эттирилади. Бу депутатларга бюджет маблағлари сарфини тизимли таҳлил қилиш, қўлланилган харид усуллари ва уларнинг натижаларини баҳолаш, зарур ҳолларда эса парламент назорати воситаларидан фойдаланиш имконини беради.

Ўзгартишларнинг алоҳида қисми тадбиркорларнинг ҳуқуқларини ҳимоя қилишга қаратилган. Давлат харидлари жараёнида юзага келадиган шикоятларни жойларда тезкор кўриб чиқиш учун Давлат харидлари соҳасидаги шикоятларни кўриб чиқиш комиссияси ҳузурида доимий фаолият юритадиган ҳудудий комиссияларни ташкил этиш таклиф этилмоқда.

Кутилишича, бундай механизм тадбиркорларнинг мурожаатларини тезроқ кўриб чиқиш ва юзага келадиган низоларни ҳал этиш, шунингдек, уларнинг вақт ва молиявий харажатларини қисқартириш имконини беради.

Депутатларнинг баҳолашича, давлат харидлари ҳақидаги маълумотларнинг очиқлигини ошириш, тўғридан-тўғри шартномалар бўйича амалга оширилган харидлар ҳақидаги маълумотларни парламент назоратига киритиш ва шикоятларни кўриб чиқиш механизмини такомиллаштириш тизимнинг шаффофлиги ва ҳисобдорлигини оширишга хизмат қилади.

Шунингдек, таклиф этилаётган нормалар рақобат муҳитини кенгайтириш, тадбиркорларни давлат харидларида иштирок этишга рағбатлантириш ҳамда бюджет маблағларидан самарали ва мақсадли фойдаланиш устидан назоратни кучайтиришга ёрдам бериши кутилмоқда.