Тошкент, Ўзбекистон (UzDaily.uz) — Ўзбекистон ва Сингапур фармацевтика, биотехнология, тиббиёт ҳамда таълим соҳаларида қўшма лойиҳаларни амалга ошириш истиқболларини кўриб чиқди. Музокараларни Тиббиёт ва фармацевтика тармоғини ривожлантириш агентлиги директори Абдулла Азизов Сингапурнинг илмий ва таълим муассасалари вакиллари билан ўтказди.
Учрашув 2026 йил 29 октябрь куни бўлиб ўтди. Унда A*STAR агентлиги вакили доктор И Чжэн ҳамда Наньян технологик университети (NTU) профессори Кэролайн Ли иштирок этди.
Томонлар академик ҳамкорликни йўлга қўйиш, қўшма таълим дастурларини ишга тушириш ва илмий тадқиқотлар ўтказиш имкониятларини муҳокама қилди. Шунингдек, тажриба алмашиш, мутахассислар тайёрлаш ва аниқ тиббиёт, геномика ҳамда биоинформатика соҳаларида замонавий тадқиқот усулларини қўллаш масалаларига алоҳида эътибор қаратилди.
Музокаралардан сўнг Сингапур делегацияси вакиллари BioPharma City кластери инфратузилмаси ва лойиҳалари билан танишди. Уларга Ўзбекистонда фармацевтика ишлаб чиқаришини ривожлантириш, илмий тадқиқотлар ва клиник ишланмаларни амалга ошириш учун яратилаётган имкониятлар ҳам тақдим этилди.
Бундан ташқари, делегация Фармацевтика техник университетига (PTU) ташриф буюриб, унинг таълим дастурлари ва илмий фаолият йўналишлари билан танишди.
Учрашув давомида қўшма таълим ва илмий лойиҳаларни тайёрлаш бўйича кейинги қадамлар, шунингдек, икки мамлакат университетлари ва тадқиқот ташкилотлари ўртасидаги алоқаларни ривожлантириш масалалари ҳам муҳокама қилинди.
