Ўзбекистон ва ЖАР савдо-иқтисодий ҳамкорликни кенгайтиради
Тошкент, Ўзбекистон (UzDaily.uz) — Ўзбекистон инвестициялар, саноат ва савдо вазири Лазиз Қудратов Жанубий Африка Республикаси савдо, саноат ва рақобат вазири Паркс Тау билан видеоконференция ўтказди. Унда томонлар савдо-иқтисодий, инвестициявий ва саноат соҳаларидаги ҳамкорликни кенгайтириш масалаларини муҳокама қилди. Бу ҳақда Ўзбекистон Республикаси Инвестициялар, саноат ва савдо вазирлиги хабар берди.
Музокараларнинг асосий мавзуларидан бири Ўзбекистон компанияларининг Жанубий Африкага бизнес-миссиясини ташкил этишга тайёргарлик бўлди. 2026 йил кузида Ўзбекистондан 50 га яқин корхона Йоханнесбург шаҳрига бориши режалаштирилмоқда. Улар учун Жанубий Африка бизнеси вакиллари билан B2B форматида манзилли учрашувлар ўтказиш кўзда тутилган.
Томонлар, шунингдек, устувор тармоқларда қўшма лойиҳаларни амалга ошириш истиқболларини кўриб чиқди. Икки томонлама ҳамкорликни янада ривожлантириш механизмларидан бирига айланиши керак бўлган Ҳукуматлараро комиссияни ташкил этиш масаласига алоҳида эътибор қаратилди.
Музокаралар доирасида савдо ва инвестицияларни ҳимоя қилиш соҳаларида битимлар тайёрлаш масаласи ҳам муҳокама қилинди. Бундан ташқари, Преференциал савдо тўғрисидаги битим устида иш бошлаш имконияти кўриб чиқилди.
Видеоконференция якунлари бўйича Ўзбекистон ва ЖАР қўшма ташаббусларни ишлаб чиқишни давом эттириш ҳамда истиқболли лойиҳалар портфелини шакллантиришга келишиб олди.
