Ўзбекистон ва Индонезия ислом молия ва инвестиция масалаларини муҳокама қилишди

Тошкент, Ўзбекистон (UzDaily.uz) — 13 май куни Ўзбекистон Республикаси инвестициялар, саноат ва савдо вазири ўринбосари Илзат Касимов Индонезия Ҳаж маблағларини бошқариш агентлигининг инвестициялар бўйича директори Индра Гунаван билан учрашди.

Индонезия Ҳаж маблағларини бошқариш агентлиги давлат молиявий муассасаси ҳисобланиб, зиёратчилар маблағларини шариат тамойиллари асосида бошқаради ҳамда сукук, кўчмас мулк ва ислом ҳуқуқига мувофиқ келувчи бошқа воситалар орқали ҳаж экотизимини ривожлантиришга ихтисослашган.

Музокаралар давомида савдо-иқтисодий ва инвестициявий ҳамкорликни кенгайтириш, исломий молиялаштириш механизмларини жорий этиш, шунингдек, Ўзбекистонда сукук, муробаҳа ва ижара каби молиявий воситаларни ривожлантириш истиқболлари муҳокама қилинди.

Томонлар ҳалол экотизимни ва зиёрат туризмини ривожлантириш имкониятларини, жумладан, Самарқанд, Бухоро ва Тошкент шаҳарларида меҳмонхона инфратузилмасини яратиш ҳамда Жанубий-Шарқий Осиё бозорларига йўналтирилган қўшма лойиҳаларни амалга ошириш масалаларини кўриб чиқдилар.

Учрашув якунида Индонезия томони юбилей V Тошкент халқаро инвестиция форумида иштирок этишга таклиф қилинди.