Ўзбекистон ва БМТ ижтимоий волонтёрликни муҳокама қилди

Тошкент, Ўзбекистон (UzDaily.uz) — Ўзбекистон Миллий ижтимоий ҳимоя агентлиги БМТ Волонтёрлар дастурининг (UNV) ижрочи координатори Тойли Қурбонов билан мамлакатда ижтимоий волонтёрликни ривожлантириш масалаларини муҳокама қилди.

Томонлар ижтимоий соҳада кўнгиллилар ёрдамининг барқарор миллий тизимини шакллантириш имкониятларини кўриб чиқди.

Ҳозирги вақтда «Волонтёрлар — Инсон» ва «Меҳр» лойиҳалари доирасида кўнгиллилар ижтимоий ходимлар билан биргаликда ёрдамга муҳтож фуқаролар, кексалар ва оғир ҳаётий вазиятга тушиб қолган оилаларни қўллаб-қувватламоқда.

Учрашув давомида «Инсон» марказлари негизида ижтимоий волонтёрликни янада ривожлантириш бўйича чора-тадбирлар таклиф қилинди. Шунингдек, кўнгиллиларни БМТ Волонтёрлар дастури имкониятларига кенгроқ жалб қилиш ва инклюзив волонтёрликни ривожлантириш масалалари муҳокама қилинди.

Томонлар ушбу йўналишларда ҳамкорликни мустаҳкамлаш ва қўшма лойиҳаларни амалга ошириш бўйича кейинги қадамларни белгилаб олди.