Тошкент, Ўзбекистон (UzDaily.uz) — 29 сентябрь куни Хива шаҳрида Тўртинчи Ўзбекистон-Беларусь парламентлараро форуми доирасида Ўзбекистон ва Беларус маҳаллий вакиллик органлари раҳбарларининг учрашуви бўлиб ўтди.
Томонлар ҳудудлараро алоқаларни ривожлантириш, янги иқтисодий ташаббуслар ва икки мамлакат ҳудудлари ўртасидаги амалий ҳамкорлик масалаларини муҳокама қилди. Учрашув якунлари бўйича 15 та икки томонлама келишув имзоланди.
Бу ҳақда Ўзбекистон Республикаси Олий Мажлиси Сенати матбуот хизмати хабар берди.
Учрашув иштирокчилари Ўзбекистон ва Беларусь ўртасидаги стратегик шерикликни янада мустаҳкамлашда маҳаллий даражадаги ҳамкорлик муҳим аҳамиятга эга эканини таъкидлади. Ҳудудлар ва маҳаллий ҳамжамиятлар вакиллари ўртасида тўғридан-тўғри алоқаларни ривожлантиришга алоҳида эътибор қаратилди.
Томонлар ҳудудларнинг ижтимоий-иқтисодий ривожланишида, аҳоли билан ҳамкорлик қилишда, фуқароларнинг иштирокини кенгайтиришда ва жамоат ташаббусларини қўллаб-қувватлашда маҳаллий вакиллик органларининг роли ҳақида фикр алмашди.
Шунингдек, ҳудудларнинг иқтисодий ва ижтимоий салоҳиятидан самарали фойдаланиш, тадбиркорлик ва инвестиция фаоллигини рағбатлантириш ҳамда иқтисодий шерикликнинг янги йўналишларини ривожлантириш масалалари алоҳида кўриб чиқилди.
Муҳокамаларда депутатлар дипломатиясига ҳам муҳим ўрин ажратилди. Томонлар маҳаллий вакиллик органлари ўртасида мунтазам мулоқотни ривожлантириш, ўзаро ташрифлар ва ишчи учрашувларни кенгайтиришга келишиб олди.
Имзоланган 15 та келишув ҳудудлараро ҳамкорликни кенгайтириш, тўғридан-тўғри алоқаларни ривожлантириш, тажриба алмашиш ва ҳамкорликни янги амалий босқичга олиб чиқишга қаратилган.
Форум доирасида Хива шаҳрида саноат кооперацияси, агросаноат мажмуаси, туризм, таълим, соғлиқни сақлаш, фан ва инновацияларга бағишланган қатор мавзули секция йиғилишлари ҳам бўлиб ўтди.
«Ўзбекистон ва Беларусь: саноат кооперацияси, қўшма инвестициялар, меҳнат салоҳиятини рўёбга чиқариш» мавзусидаги биринчи секция йиғилишида иштирокчилар саноат ҳамкорлигини кенгайтириш, инвестиция лойиҳаларини амалга ошириш, ишлаб чиқаришни маҳаллийлаштириш ва қўшма корхоналар ташкил этиш имкониятларини кўриб чиқди.
Парламент аъзолари, давлат органлари, ишбилармон доиралар, тадбиркорлик бирлашмалари ва тадбиркор аёллар вакиллари кооперация занжирларини ривожлантириш, янги турдаги маҳсулотларни ўзлаштириш, замонавий технологияларни жорий этиш ва корхоналарнинг янги бозорларга чиқиши масалаларини муҳокама қилди.
Тадбиркорлик фаолиятида аёлларнинг иштирокини кенгайтириш, иш ўринлари яратиш, касбий кўникмаларни ривожлантириш ва аёллар бизнес ташаббусларини қўллаб-қувватлашга алоҳида эътибор қаратилди.
«Агросаноат мажмуасида ҳамкорлик: озиқ-овқат хавфсизлиги ва биотехнологиялар» мавзусидаги иккинчи секция йиғилишида агросаноат соҳасидаги ҳамкорликнинг ҳолати, технологик алмашинув ва янги қўшма лойиҳалар муҳокама қилинди.
Иштирокчилар озиқ-овқат ва фитосанитар хавфсизлик, замонавий агротехнологиялар ва биотехнологияларни жорий этиш, қишлоқ хўжалиги маҳсулотларини қайта ишлаш ва инвестицияларни жалб қилиш масалаларини кўриб чиқди.
Таклифлар орасида Беларусь қишлоқ хўжалиги техникасини Ўзбекистонда ишлаб чиқаришни маҳаллийлаштириш, қўшма ишлаб чиқариш корхоналарини ташкил этиш ва инвестиция лойиҳаларини кенгайтириш масалалари ҳам ўрин олди.
Шунингдек, чорвачилик, генетика ва ветеринария, селекция ва уруғчилик, ўсимликларни биологик ҳимоя қилиш, агробиотехнологиялар ва рақамли ечимлар соҳаларида ҳамкорлик йўналишлари белгилаб олинди. Томонлар қўшма тадқиқотлар ўтказиш ва малакали мутахассислар тайёрлашдан манфаатдор эканини билдирди.
Йиғилиш якунлари бўйича 35,5 млн сўмлик 11 та шартнома имзоланди.
Учинчи секция йиғилиши Ўзбекистон ва Беларуснинг гуманитар ва ижтимоий соҳадаги стратегик шериклигига бағишланди.
Унда Олий Мажлис Сенати ва Беларусь Миллий мажлиси Республика кенгаши аъзолари, давлат ташкилотлари, таълим ва илмий муассасалар, соғлиқни сақлаш соҳаси вакиллари, шунингдек, Ёшлар парламенти иштирок этди.
Иштирокчилар олий ва профессионал таълим, илмий тадқиқотлар, соғлиқни сақлаш, фармацевтика ва инновациялар соҳаларида ҳамкорликни ривожлантириш масалаларини муҳокама қилди.
Хусусан, олий таълим муассасалари ўртасидаги ҳамкорликни кенгайтириш, муҳандис кадрларни биргаликда тайёрлаш ва профессионал таълим соҳасида тажриба алмашиш масалалари муҳокама қилинди.
Бундан ташқари, биохилма-хиллик, генетика ва замонавий технологиялар соҳасида қўшма тадқиқотлар ўтказиш имкониятлари кўриб чиқилди.
Соғлиқни сақлаш соҳасида она ва бола саломатлигини муҳофаза қилиш, педиатрия, тиббий хизматлар сифати ва улардан фойдаланиш имкониятини ошириш, соғлиқни сақлаш тизимини рақамлаштириш масалалари муҳокама қилинди. Томонлар фармацевтика соҳасидаги ҳамкорлик истиқболларини ҳам алоҳида кўриб чиқди.
Тўртинчи секция йиғилиши «Туристик мулоқот: салоҳиятдан аниқ қўшма лойиҳалар сари» мавзусида ўтказилди. Унда туризм алмашинувини кўпайтириш, янги туристик маҳсулотлар ва қўшма йўналишлар яратиш, шунингдек, хизматлар сифатини ошириш масалалари кўриб чиқилди.
Муҳокамада икки мамлакат давлат ташкилотлари, таълим муассасалари, хусусий сектор, меҳмонхона бизнеси ва туроператорлар вакиллари иштирок этди. Иштирокчилар учинчи давлатлар бозорларида Ўзбекистон ва Беларус имкониятларини бирлаштирувчи туристик маҳсулотларни биргаликда тарғиб қилишни таклиф этди.
Ўзбекистоннинг маданий-тарихий, экологик, этник, гастрономик, таълим ва зиёрат туризми соҳаларидаги салоҳиятига алоҳида эътибор қаратилди. Беларусь томони экотуризмни ривожлантириш, туристик қишлоқлар ташкил этиш, таълим туризми ва соҳа учун кадрлар тайёрлаш тажрибасини тақдим этди.
Туристик секция йиғилиши якунлари бўйича туризм соҳасида ҳамкорлик қилиш ва туристик хизматлар кўрсатиш бўйича бир қатор келишув ва меморандумлар имзоланди.
Форум доирасида Ўзбекистон ва Беларус тадбиркор аёлларининг Тўртинчи бизнес-форуми ҳам бўлиб ўтди. Унда иштирокчилар икки мамлакат ўртасидаги ишбилармонлик алоқаларини янада ривожлантириш имкониятларини муҳокама қилди.
Умуман, томонлар икки томонлама ҳамкорликни аниқ лойиҳалар билан бойитиш, ҳудудлар ва тадбиркорлар ўртасида тўғридан-тўғри алоқаларни кенгайтириш ҳамда мавжуд иқтисодий, ижтимоий ва инсон салоҳиятидан янада самарали фойдаланиш зарурлигини таъкидлади.
