Тошкент, Ўзбекистон (UzDaily.uz) — Ўзбекистон Либерал-демократик партиясининг (O‘zLiDeP) Олий Мажлис Қонунчилик палатасидаги фракцияси улушли қурилишда фуқаролар маблағларини ҳимоя қилишнинг янги механизмларини назарда тутувчи қонун лойиҳасини маъқуллади. Бу ҳақда фракция хабарида маълум қилинди.
Ҳужжат уй-жой ва бошқа кўчмас мулк объектлари қурилишига маблағ киритаётган фуқаролар учун ҳуқуқий ва молиявий кафолатлар яратиш, шунингдек, қонунчиликда назарда тутилмаган усуллар орқали пул маблағларини жалб қилишнинг олдини олишга қаратилган.
Қонун лойиҳаси кўп квартирали уйлар ва бошқа кўчмас мулк объектларининг улушли қурилиши иштирокчилари ўртасидаги муносабатларни тартибга солади. Унда иштирокчиларнинг ҳуқуқ ва мажбуриятлари, давлат органларининг ваколатлари ҳамда уларнинг ўзаро ҳамкорлик қилиш тартиби белгиланади.
Фуқаролар маблағларини ҳимоя қилишнинг асосий механизмларидан бири эскроу ҳисобварақларидан фойдаланиш бўлади. Улушдорларнинг пуллари қурилиш компаниясининг бевосита тасарруфига ўтказилмайди, балки банкларда сақланади. Маблағларни қурилиш компаниясига ўтказиш қурилиш белгиланган талабларга мувофиқ якунланиб, объект фойдаланишга топширилганидан кейин амалга оширилиши назарда тутилган.
Муҳокама давомида депутатлар Шухрат Шарафутдинов, Екатерина Смесова, Дилмурод Артиков ва Ҳусан Ёрқулов ҳужжатнинг айрим қоидалари юзасидан саволлар берди. Масъул идоралар вакиллари кўтарилган масалалар бўйича тушунтиришлар берди.
Депутат Нуриддин Султонов қонун лойиҳасини иккинчи ўқишга тайёрлашда соҳавий қўмита томонидан амалга оширилган ишларни таъкидлаб, ҳамкасбларини ҳужжатни қўллаб-қувватлашга чақирди. Муҳокама ва саволларга берилган жавоблардан сўнг фракция қонун лойиҳасини маъқуллади.
Йиғилишда, шунингдек, урбанизация соҳасини такомиллаштириш муносабати билан Ўзбекистоннинг Шаҳарсозлик кодексига ўзгартириш ва қўшимчалар киритиш тўғрисидаги қонун лойиҳаси ҳам кўриб чиқилди.
Ҳужжат жамият ва иқтисодиёт тараққиётида шаҳарларнинг ролини ошириш, аҳоли турмуш сифатини, экологик муҳитни ва шаҳар инфратузилмасини яхшилашни назарда тутади. Шаҳарсозликнинг асосий тамойилларидан бири сифатида ҳудудларни комплекс ривожлантириш асосида аҳоли пунктларини мувозанатли режалаштиришни белгилаш таклиф этилмоқда.
Депутат Одилжон Мамадалиев қонун лойиҳаси урбанизацияни бошқариш самарадорлигини ошириш, ҳудудларни мутаносиб ривожлантириш, идоралараро ҳамкорликни мустаҳкамлаш ҳамда аҳоли учун қулай ва экологик жиҳатдан барқарор муҳитни шакллантиришга қаратилганини таъкидлади. Фракция ҳужжатни қўллаб-қувватлади.
Йиғилиш якунида кун тартибидаги масалалар бўйича тегишли қарорлар қабул қилинди.
