Тошкент, Ўзбекистон (UzDaily.uz) — Ўзбекистон рақамли технологиялар вазири Шерзод Шерматов EY компанияси вакиллари билан онлайн учрашув ўтказди. Учрашувда NVIDIA ва Dell Technologies компаниялари билан ҳамкорлик бўйича EY ҳамкори ва йўналиш раҳбари Тимоти Гроссер ҳам иштирок этди.
Томонлар Ўзбекистоннинг технологик ва инновацион экотизимини ривожлантириш масалаларини муҳокама қилди.
Сунъий интеллект, янги технологиялар ҳамда мамлакат глобал бозорда рақобатбардош бўлиши мумкин бўлган устувор йўналишларга алоҳида эътибор қаратилди. Бу ҳақда Ўзбекистон Рақамли технологиялар вазирлиги хабар берди.
Учрашув иштирокчилари халқаро технологик компаниялар ва инвестицияларни жалб қилиш, технологик хизматлар экспортини ошириш ҳамда соҳа учун малакали кадрлар тайёрлаш масалаларини кўриб чиқди.
Технологик ташаббусларни аниқ иқтисодий натижаларга айлантириш масаласига ҳам алоҳида эътибор берилди. Хусусан, юқори сифатли ва яхши маош тўланадиган янги иш ўринларини яратиш ҳақида сўз юритилди.
Вазирлик ва EY ҳамкорликни давом эттириш ҳамда амалий қадамларни белгилашдан манфаатдор эканини билдирди. Томонлар, шунингдек, IT Park ва Enterprise Uzbekistan билан биргаликда ишлаш имкониятларини ўрганади.
Вазирлик маълумотларига кўра, ҳамкорлик Ўзбекистоннинг технологик тараққиёт соҳасидаги узоқ муддатли мақсадларини қўллаб-қувватлашга қаратилган.
