Тошкент, Ўзбекистон (UzDaily.uz) — Ўзбекистон Савдо-саноат палатаси раиси Даврон Ваҳабов Испаниянинг Валенсия шаҳрида 28–29 сентябрь кунлари бўлиб ўтган Eurochambres Congress 2026 халқаро конгрессида иштирок этди.
Тадбирда 38 мамлакатдан 91 та савдо палатаси ва ташкилотнинг қарийб 200 нафар вакили иштирок этди. Иштирокчилар ягона бозор рақобатбардошлиги, иқтисодий барқарорлик, инновациялар, рақамлаштириш, энергетика ва бизнес муҳитини ривожлантириш масалаларини муҳокама қилди.
Eurochambres ўз тармоғи орқали 20 миллиондан ортиқ компания ва 1 700 та ҳудудий ҳамда маҳаллий савдо палатасини бирлаштиради. Ушбу тармоқда вакиллик қилинган компанияларнинг 93 фоиздан ортиғи кичик ва ўрта бизнес субъектларига тўғри келади.
Конгресс доирасида Даврон Ваҳабов Европа мамлакатлари савдо-саноат палаталари вакиллари билан икки томонлама учрашувлар ўтказди.
Томонлар савдо-инвестиция алоқаларини кенгайтириш, қўшма лойиҳаларни амалга ошириш, экспорт имкониятларини ошириш ва логистика соҳасидаги ҳамкорликни ривожлантириш масалаларини муҳокама қилди.
Дастурнинг алоҳида қисми Валенсиядаги Marina de Empresas инновацион хабига ташрифдан иборат бўлди. Унда савдо-саноат палаталари раҳбарлари ва хорижий делегациялар вакиллари, жумладан, Ўзбекистон Савдо-саноат палатаси раиси иштирок этди.
Marina de Empresas тадбиркорликни қўллаб-қувватлашнинг бир нечта йўналишларини бирлаштиради. Улар орасида тадбиркорларни тайёрлаш, стартапларни ривожлантириш, уларни акселерациядан ўтказиш ва инвестиция жалб қилиш йўналишлари бор. Экотизим таркибига EDEM бизнес мактаби, Lanzadera бизнес-инкубатори ва акселератори, шунингдек, Angels инвестиция жамғармаси киради.
Иштирокчилар ёш тадбиркорларни тайёрлаш, инновацион лойиҳаларни танлаш ва ривожлантириш, уларни акселерация қилиш ҳамда молиявий қўллаб-қувватлаш механизмлари билан танишди.
Lanzadera акселератори фаолияти давомида 1 100 дан ортиқ компанияни қўллаб-қувватлади ва уларнинг лойиҳаларига 200 миллион евродан ортиқ инвестиция жалб қилинди.
Marina de Empresas стартаплари саноат, логистика, чакана савдо ва агросаноат мажмуасидаги амалий бизнес вазифалари учун технологик ечимлар ишлаб чиқмоқда.
Ташриф давомида Ўзбекистон Савдо-саноат палатаси вакиллари Marina de Empresas раҳбарияти билан учрашди. Томонлар Валенсия экотизими тажрибасини Ўзбекистонда қўллаш имкониятларини кўриб чиқди.
Хусусан, ёшлар стартапларини акселерация қилиш, IT ва креатив индустрияларни ривожлантириш, шунингдек, Ўзбекистон технопарклари ва кластерлари резидентларини халқаро акселерация дастурларига интеграция қилиш масалалари муҳокама қилинди.
Eurochambres Congress 2026 да иштирок этиш ва Marina de Empresas га ташриф буюриш Ўзбекистон томонига Европа савдо-саноат палаталари ҳамда Валенсия тадбиркорлик экотизими вакиллари билан ҳамкорликнинг янги йўналишларини муҳокама қилиш имконини берди.
