Тошкент, Ўзбекистон (UzDaily.uz) — 17 сентябрь куни Ўзбекистон фуқароси уч нафар фарзанди билан Ўзбекистоннинг Истанбулдаги Бош консулхонаси кўмагида Туркиядан ватанига қайтарилди.
Туркияга ишлаш мақсадида борган аёл фарзандлари билан бирга уй-жой ва зарур ёрдамсиз қолганидан сўнг оила оғир вазиятга тушиб қолган. Бу ҳақда Ўзбекистоннинг Истанбулдаги Бош консулхонаси хабар берди.
Мурожаат келиб тушгач, Бош консулхона Ўзбекистон Республикаси Миграция агентлиги билан ҳамкорликда оилага амалий ёрдам кўрсатди. Ватандошимиз ва унинг фарзандлари озиқ-овқат маҳсулотлари билан таъминланди, зарур ҳужжатларни расмийлаштиришда кўмаклашилди ҳамда Ўзбекистонга қайтиш учун авиачипталар олиб берилди.
Аёл аэропортда хорижда оғир вазиятга тушиб қолган аёллар ва болалар тақдирига эътибор қаратилаётгани, шунингдек, уларни ватанга қайтариш бўйича ташаббуслар учун Президентга миннатдорлик билдирди.
У, шунингдек, кўрсатилган ёрдам учун Миграция агентлиги ва Бош консулхона ходимларига ташаккур билдирди.
Ўзбекистоннинг Истанбулдаги Бош консулхонаси хорижда оғир вазиятга тушиб қолган мамлакат фуқароларига амалдаги қонунчилик доирасида консуллик-ҳуқуқий ва амалий ёрдам кўрсатишни давом эттиришини маълум қилди.
