Тошкент, Ўзбекистон (UzDaily.uz) — Ўзбекистон терма жамоаси Япониянинг Айти префектураси ва Нагоя шаҳрида бўлиб ўтган XX ёзги Осиё ўйинларидаги иштирокини якунлади. Ўзбекистонлик спортчилар 21 та олтин, 25 та кумуш ва 24 та бронза медалини қўлга киритиб, жами 70 та медалга эга бўлди. Бу умумжамоа ҳисобида бешинчи ўрин бўлиб, аввалги Ханчжоудаги Осиё ўйинларидаги натижа билан бир хил.
Олтин медаллар сони бўйича Ўзбекистон Ҳиндистон билан тенглашди: ҳар икки мамлакат ҳисобида 21 тадан ғалаба бор. Тўртинчи ўрин Ҳиндистон терма жамоасига кўпроқ кумуш медалларга эга бўлгани учун насиб этди — 27 тага қарши 25 та.
Мусобақа умумжамоа ҳисобидаги кучли учликдан Хитой (169 та олтин, жами 341 та медаль), Осиё ўйинлари мезбони Япония (83 та олтин, 269 та медаль) ва Корея Республикаси (39 та олтин, 150 та медаль) жой олди.
Кураш, енгил атлетика ва эшкак эшиш
Ўзбекистонлик спортчилар 19 та спорт турида медалларга эга бўлди, уларнинг 13 тасида олтин медал қўлга киритилди.
Олтин медаллар ҳисобига яна энг катта ҳиссани курашчилар қўшди: тўртта ғалаба ва иккита бронза медали. Бу Ханчжоудаги натижанинг айнан ўзи. Енгил атлетика спортчилари учта олтин медални қўлга киритди, шунингдек, битта бронза медалга эга бўлди.
Боксчилар, дзюдочилар ва байдарка ҳамда каноэда эшкак эшиш спортчилари ҳисобида иккитадан ғалаба бор. Боксда терма жамоа еттита медальни қўлга киритди: иккита олтин, битта кумуш ва тўртта бронза. Дзюдочилар ҳам еттита медаль олди: иккитадан олтин ва кумуш ҳамда учта бронза.
Жами медаллар сони бўйича энг сермаҳсул натижани эшкак эшишнинг ҳар икки тури қайд этди. Байдарка ва каноэда эшкак эшишда тўққизта медаль — иккита олтин, олтита кумуш ва битта бронза қўлга киритилди. Академик эшкак эшишда ҳам тўққизта медаль — битта олтин, олтита кумуш ва иккита бронза медал олинди.
Кураш, таэквондо, каратэ, спорт ва бадиий гимнастика, спорт отиш ва оғир атлетика спортчилари биттадан олтин медаль келтирди. Курашчилар олтин медалдан ташқари учта кумуш ва битта бронза медалга эга бўлди. Таэквондочилар эса иккита кумуш ва битта бронза медални қўлга киритди.
Терма жамоа қиличбозлик (битта кумуш ва иккита бронза), аралаш яккакурашлар (иккита кумуш ва битта бронза) ҳамда ушу бўйича олтин медалсиз, аммо медаллар билан иштирок этди. Трекда велоспорт, теннис ва киберспорт вакиллари ҳисобини биттадан бронза медаль билан тўлдирди.
Натижа Ханчжоудаги кўрсаткичга деярли тенг
2022 йилги Осиё ўйинлари пандемия сабабли 2023 йил кузида Ханчжоуда ўтказилган эди. Ўшанда Ўзбекистон терма жамоаси 22 та олтин, 18 та кумуш ва 31 та бронза медални қўлга киритиб, жами 71 та медалга эга бўлган. Ўша мусобақада ҳам жамоа бешинчи ўринни эгаллаган.
Шу тариқа, медалларнинг умумий сони биртага, олтин медаллар сони ҳам биртага камайди. Медаллар таркиби эса ўзгарди: кумуш медаллар сони еттитага кўпайди, бронза медаллар сони эса еттитага камайди.
Қатор спорт турларида Ўзбекистон бу Осиё ўйинларида илк бор шоҳсупанинг энг юқори поғонасига кўтарилди. Ханчжоуда медаллар қўлга киритилмаган спорт гимнастикасида, шунингдек, икки йил аввал ўзбекистонлик спортчилар фақат кумуш ва бронза медалларини олган спорт отиш ва оғир атлетикада олтин медаллар қўлга киритилди. Аралаш яккакурашлар ва киберспорт ҳам илк бор медаллар ҳисобига киритилди.
Академик эшкак эшиш ҳамда байдарка ва каноэда эшкак эшишда медалларнинг умумий сони ошди. Бироқ академик эшкак эшишда олтин медаллар сони камайди — Ханчжоудаги иккита олтинга қарши бу сафар битта олтин медаль қўлга киритилди. Боксчилар аввалгига қараганда кўпроқ медаль олиб қайтди — бештага қарши еттита, бироқ уларнинг ғалабалари сони камайди — учтага қарши иккита.
Дзюдо ва бадиий гимнастикада олтин медаллар сони биттага камайди. Ханчжоуда биттадан ғалаба келтирган қиличбозлик ва велоспорт бу сафар олтин медалсиз қолди. Аввалги Осиё ўйинларида бешта медаль қўлга киритилган шахмат ва футболда бу сафар медаллар бўлмади.
Марказий Осиё етакчиси
Ўзбекистон яна бир бор умумжамоа ҳисобида Марказий Осиёнинг энг яхши натижа қайд этган мамлакати бўлди. Минтақа давлатлари қўлга киритган 36 та олтин медалнинг 21 таси ва жами 186 та медалнинг 70 таси Ўзбекистон ҳисобига тўғри келди.
Қозоғистон саккизинчи ўринни эгаллади: 12 та олтин, 24 та кумуш ва 48 та бронза медал. Медалларнинг умумий сони бўйича — 84 та — Қозоғистон терма жамоаси яна Ўзбекистонни ортда қолдирди, бироқ унинг медалларининг ярмидан кўпи бронза медаллардан иборат. Ханчжоу билан таққослаганда, Қозоғистон 11-ўриндан саккизинчи ўринга кўтарилди ва олтин медаллар сонини иккитага оширди.
Тожикистон иккида олтин, бешта кумуш ва тўққизта бронза медал билан 22-ўринни эгаллади. Унинг умумий натижаси икки баравардан кўпроқ ошди — еттита медалдан 16 тага етди.
Қирғизистон 26-ўринни эгаллади: битта олтин, учта кумуш ва 10 та бронза, жами 14 та медаль. Ханчжоуда Қирғизистон терма жамоаси тўртта ғалабани қўлга киритиб, 18-ўринни эгаллаган эди.
Туркманистон Осиё ўйинларини иккита кумуш медаль билан 31-ўринда якунлади. Икки йил аввал Туркманистон терма жамоаси ҳисобида еттита медаль бўлган.
\
