Тошкент, Ўзбекистон (UzDaily.uz) — «Айритом» чегара божхона постида Афғонистондан Ўзбекистон ҳудудига катта миқдордаги гиёҳвандлик моддаларини ноқонуний олиб киришнинг олди олинди.
Давлат хавфсизлик хизмати Чегара қўшинлари ва Давлат божхона қўмитаси ходимлари «Mercedes-Benz» русумли юк автомобили тиркамасидан таркибида гашиш ва афюн бўлган 98 та ўрамни аниқлади.
Жами яширилган жойдан 39 килограмм 86 грамм гашиш ва 9 килограмм 498 грамм афюн ашёвий далил сифатида олинди.
Автомобиль Афғонистондан Ўзбекистон ҳудудига кириб келаётган бўлган. Уни 1985 йилда туғилган, Термиз туманида яшовчи фуқаро бошқариб келган.
Гиёҳвандлик моддалари тиркаманинг поли остига яширилган.
Чуқурлаштирилган текширув давомида ҳуқуқни муҳофаза қилувчи органлар ходимлари юкхона боғловчи элементининг пастки қисми остида махсус жиҳозланган яширин жойни аниқлади. Унинг ичида гиёҳвандлик воситалари экани тахмин қилинаётган моддалар солинган 98 та ўрам борлиги аниқланди.
Тақиқланган моддаларни яшириш учун полиэтилен пакетлар, фольга ва скотчдан фойдаланилган. Аниқланган ўрамлар белгиланган процессуал тартибда олиб қўйилди.
Мазкур ҳолат юзасидан Ўзбекистон Республикаси Жиноят кодексининг 246-моддаси 2-қисми билан жиноят иши қўзғатилди.
Тергов доирасида гиёҳвандлик моддаларини ноқонуний олиб киришни ташкил этишга алоқадор буюртмачилар ва бошқа шахсларни аниқлаш чоралари кўрилмоқда.
Давлат хавфсизлик хизмати чегара қўшинлари ва Давлат божхона қўмитаси мамлакатга гиёҳванд моддалар контрабандаси каналларини аниқлаш ва уларга барҳам бериш бўйича ҳамкорликда иш олиб бормоқда.
