Тошкент, Ўзбекистон (UzDaily.uz) — «Тадбиркорликни ривожлантириш компанияси» АЖ сифатни бошқариш ва коррупцияга қарши бошқарув соҳасидаги халқаро стандартларга мувофиқлигини қайта тасдиқлади.
Компанияга ISO 9001:2015 ва ISO 37001:2025 сертификатлари Европанинг Astraia Certification сертификатлаш ташкилоти томонидан берилди.
Сертификатлар компаниянинг сифат менежменти тизими ҳамда коррупцияга қарши бошқарув тизими молиявий хизматлар кўрсатиш соҳасидаги халқаро талабларга мувофиқлигини тасдиқлайди.
Компания мазкур йўналишлар бўйича биринчи марта 2025 йилда сертификатдан ўтган. Навбатдаги тасдиқлаш доирасида сифат менежменти тизимининг ISO 9001:2015 талабларига мувофиқлиги қайта тасдиқланди.
Коррупцияга қарши бошқарув тизими 2025 йилда янгиланган ISO 37001 стандартининг янги таҳрири бўйича сертификатланди.
Компанияда таъкидланишича, сертификатларнинг олиниши кўрсатилаётган хизматлар сифатини ошириш, фаолият шаффофлигини таъминлаш ва коррупциявий хатарларни камайтириш бўйича изчил ишларни акс эттиради.
«Тадбиркорликни ривожлантириш компанияси» Тадбиркорлик фаолиятини қўллаб-қувватлаш давлат жамғармасини акциядорлик жамиятига айлантириш натижасида ташкил этилган. Ўзбекистон Президенти Шавкат Мирзиёевнинг фармонига мувофиқ, компаниянинг муассиси Иқтисодиёт ва молия вазирлиги ҳисобланади.
Кичик ва ўрта бизнесни молиявий қўллаб-қувватлаш ислоҳотлари доирасида TРК тадбиркорларни қўллаб-қувватлашнинг қўшимча инструментларини жорий этиш имкониятига эга бўлди. Улар қаторига тадбиркорлик лойиҳаларини улушли молиялаштириш, хизматлар ипотекаси ва кафилликлар бериш механизмларини кенгайтириш киради.
Компания, шунингдек, маҳаллий ва халқаро капитал бозорларида, жумладан, халқаро молия институтлари ва ҳукуматнинг молиявий ташкилотлари маблағлари ҳисобидан молиялаштиришни жалб қилиши мумкин.
TРК янги иш ўринларини яратиш, кичик ва ўрта бизнеснинг инновацион фаолиятини қўллаб-қувватлаш ҳамда янги турдаги маҳсулотлар ишлаб чиқаришни ривожлантиришга қаратилган давлат, тармоқ ва ҳудудий лойиҳаларни амалга оширишда иштирок этади.
Бундан ташқари, компания ўзини ўзи банд қилган фуқароларнинг лойиҳаларини молиялаштиради ҳамда «яшил» ва энергия тежамкор технологияларни жорий этишни қўллаб-қувватлайди.
