Ўзбекистон–Колумбия учрашувини Энтони Тейлор бошқаради

Тошкент, Ўзбекистон (UzDaily.uz) — Футбол бўйича жаҳон чемпионатлари тарихида Ўзбекистон терма жамоасининг илк ўйинини англиялик ҳакам Энтони Тейлор бошқаради.

Ўзбекистон миллий терма жамоаси 2026 йилги футбол бўйича жаҳон чемпионатидаги иштирокини 18 июнь куни гуруҳ босқичида Колумбия терма жамоасига қарши баҳс билан бошлайди. Учрашув Мехико шаҳридаги «Мехико Сити Стэдиум» стадионида бўлиб ўтади.

Ушбу ўйиннинг бош ҳаками этиб Англия вакили Энтони Тейлор тайинланди. Унга ҳамюртлари Гэри Бесуик ва Адам Нанн ёрдам беради.

Тўртинчи ҳакам вазифасини Хуан Кальдерон бажаради. Захирадаги ёрдамчи ҳакам этиб эса Хуан Карлос Мора тайинланган. Икки расмий ҳам Коста-Рика вакиллари ҳисобланади.

Учрашув К гуруҳи доирасида ўтказилади ва ўзбек футболи учун тарихий аҳамиятга эга бўлади, чунки Ўзбекистон терма жамоаси илк бор жаҳон чемпионатининг финал босқичида иштирок этмоқда.

Баҳс 18 июнь куни Тошкент вақти билан соат 07:00 да бошланиши режалаштирилган.