Ўзбекистонда менингококк инфекциясига қарши чоралар кучайтирилди

Тошкент, Ўзбекистон (UzDaily.uz) — Ўзбекистонда менингококк инфекцияси билан касалланиш ҳолатлари ошиши муносабати билан қўшимча чора-тадбирлар кўрилмоқда.

Санитария-эпидемиологик фаровонлик ва жамоат саломатлиги қўмитаси маълумотига кўра, 2026 йилда касаллик ҳолатларининг бироз ошиши қайд этилган бўлиб, бу айниқса болалар ўртасида профилактика тадбирларини кучайтиришни талаб этган.

Инфекциянинг янада тарқалишини олдини олиш мақсадида мамлакатга 8024 доза вакцина олиб келинган. Ҳозирга қадар касалланганлар билан алоқада бўлган 4862 нафар шахс эмлаш билан қамраб олинган. Вакцинацияга тиббий қарши кўрсатмалари бўлган фуқаролар учун эса шифокорлар назорати остида кимёвий профилактика ташкил этилган.

Расмий маълумотларга кўра, 2026 йилнинг биринчи чорагида республика бўйича 174 та менингококк инфекцияси ҳолати қайд этилган бўлиб, уларнинг 168 таси 14 ёшгача бўлган болалар ҳиссасига тўғри келади. Апрель ойида эса март ойига нисбатан касалланиш 14 фоизга камайгани кузатилган.

Менингит — бу одатда бактериялар ёки вируслар сабабли келиб чиқадиган бош ва орқа мия пардалари яллиғланишидир. У тез ривожланиши билан хавфли бўлиб, ўз вақтида тиббий ёрдамни талаб қилади.

Мутахассислар профилактика чоралари сифатида ўз вақтида эмланиш, шахсий гигиена қоидаларига риоя қилиш, аломатлар пайдо бўлганда зудлик билан шифокорга мурожаат қилиш, шунингдек одамлар кўп тўпланадиган жойларга боришда эҳтиёткор бўлишни тавсия этмоқда. Шунингдек, ҳаж ва умра сафарларидан олдин эмланиш, қайтгандан кейин эса оммавий тадбирларда иштирокни чеклаш зарурлиги алоҳида таъкидланди.

Вазирликда таъкидланишича, вакцинация менингококк инфекциясидан ҳимояланишнинг энг самарали усули ҳисобланади.

Шу билан бирга, фуқаролар эпидемиологик вазият ҳақида маълумот олишда фақат расмий манбаларга таянишга чақирилди.

Қўмита мамлакатда барқарор санитария-эпидемиологик ҳолатни таъминлашга қаратилган чора-тадбирларни амалга оширишни давом эттирмоқда.