Ўзбекистонда «Келажак мероси» халқаро мукофоти таъсис этилди

Тошкент, Ўзбекистон (UzDaily.uz) — Ўзбекистонда «Келажак мероси» номли халқаро мукофот таъсис этилди. Мукофот мамлакат ичида ва унинг ташқарисида адабиёт, маданият, санъат, фан, таълим ҳамда рақамли технологиялар соҳаларида фаолият юритаётган ва катта ютуқларга эришган истеъдодли шахсларни қўллаб-қувватлаш ҳамда рағбатлантиришни мақсад қилади.

Президент қарорига кўра, ушбу ташаббус ижодий ва илмий соҳа вакилларининг миллий ҳамда умуминсоний қадриятларни ривожлантиришга қўшган ҳиссасини рағбатлантириш, шунингдек, маданий ва таълимий тараққиётни қўллаб-қувватлашга қаратилган.

2025 йилдан бошлаб мукофот учун танлов ҳар йили етти йўналиш бўйича ўтказилади: адабиёт; маданий мерос; театр ва кино; мусиқа ва рақс; тасвирий ва амалий санъат; мода ва дизайн; фан, таълим ҳамда рақамли технологиялар.

Ҳар бир номинация бўйича ғолиблар статуэтка, диплом ва 10 000 АҚШ доллари миқдоридаги пул мукофоти билан тақдирланадилар.