Тошкент, Ўзбекистон (UzDaily.uz) — Ўзбекистонда болаларга нисбатан жинсий зўравонлик учун умрбод озодликдан маҳрум қилиш жазосини жорий этиш таклиф қилинди. Бу ҳақда Ижтимоий ҳимоя миллий агентлиги директорининг биринчи ўринбосари Шаҳноза Мирзиёева маълум қилди.
Унинг сўзларига кўра, Ижтимоий ҳимоя миллий агентлиги масъул давлат идоралари билан ҳамкорликда бир неча ой давомида болаларни ҳимоя қилиш соҳасидаги қонунчиликни такомиллаштириш бўйича таклифларни ишлаб чиқди.
Тайёрланган ташаббуслар тўплами кўриб чиқиш учун аллақачон юборилган. Асосий таклифлардан бири вояга етмаганларга нисбатан жинсий зўравонлик учун жазони, жумладан, умрбод озодликдан маҳрум қилишгача кучайтиришдан иборат.
Бундан ташқари, болаларга ғамхўрлик қилиш бўйича мажбуриятларни лозим даражада бажармаган ҳолатларда ота-оналарнинг жавобгарлигини ошириш таклиф этилмоқда.
Айрим ўзгаришлар педагогларга ҳам тааллуқли бўлиши мумкин. Хусусан, агентлик таълим соҳаси ходимларининг болаларга нисбатан зўравонлик ишлатиши ва уларни камситиши учун жавобгарлигини кучайтиришни таклиф қилмоқда.
Таклиф этилаётган чоралар зўравонликдан жабрланган вояга етмаганлар учун кафолатларни кенгайтиришни ҳам назарда тутади. Гап тергов ва суд муҳокамасининг барча босқичларида уларга юридик ёрдам ва ҳимоя кўрсатилишини таъминлаш ҳақида бормоқда.
Шаҳноза Мирзиёеванинг сўзларига кўра, тайёрланган қонунчилик ташаббуслари болалар ҳимоясини кучайтириш ҳамда уларнинг хавфсизлигини таъминлаши лозим бўлган катталар ва мутахассисларнинг жавобгарлигини оширишга қаратилган.
