Тошкент, Ўзбекистон (UzDaily.uz) — Рақобат қўмитаси Агросаноат мажмуаси устидан назорат инспекцияси билан ҳамкорликда Фонднинг биржа савдолари орқали буғдой харид қилган ва ун ишлаб чиқариш билан шуғулланувчи корхоналарни қайта хатловдан ўтказди.
Текширув биржа савдоларига талаб юқори бўлган маҳсулотларни чиқариш, уларни реализация қилиш ва нархларни шакллантиришга таъсир қилувчи омилларни мунтазам мониторинг қилиш доирасида ўтказилди. Хусусан, гап буғдой ва ун ҳақида бормоқда.
Хатлов давомида мутахассислар корхоналарнинг ишлаб чиқариш қувватлари, донни қайта ишлаш ва тайёр маҳсулот ишлаб чиқариш ҳажмлари, омборхона ҳамда бошқа сақлаш қувватларини ўрганди. Шунингдек, мувофиқлик сертификатлари ва санитария-эпидемиология хулосалари мавжудлиги текширилди.
Текширув якунларига кўра, Ўзбекистонда ун ишлаб чиқариш фаолиятини амалга ошираётган 301 та тадбиркорлик субъекти мавжудлиги аниқланди.
Шу билан бирга, 49 та корхонанинг ўз ишлаб чиқариш қувватлари мавжуд эмас. Улар давалик хомашёси асосида тузилган шартномалар асосида фаолият юритмоқда. Яна 22 та корхона вақтинча фаолият юритмаётган бўлса, олти та корхона фаолияти тўхтатилган.
Бундан ташқари, 42 та корхонада мувофиқлик сертификати мавжуд эмаслиги, саккизта корхонада эса санитария-эпидемиология хулосаси йўқлиги аниқланди.
Шу тариқа, хатлов давомида юқорида қайд этилган номувофиқликлар ёки фаолият хусусиятларига эга 127 та корхона аниқланди.
Текширув натижаларига кўра, Рақобат қўмитаси биржа савдолари орқали Фонд буғдойини харид қилган корхоналар томонидан мазкур буғдойдан мақсадли фойдаланилиши устидан назоратни кучайтириш бўйича тегишли идораларга таклифлар киритди.
Шунингдек, мазкур соҳада амалдаги тартибга солиш механизмларини такомиллаштириш таклиф қилинди.
