Шошилинч
7
Ўзбекистон

Ўзбекистон ва Туркия чиқиндилар соҳасидаги ҳамкорликни кенгайтиради

Ўзбекистон ва Туркия чиқиндилар соҳасидаги ҳамкорликни кенгайтиради
Ўзбекистон ва Туркия чиқиндилар соҳасидаги ҳамкорликни кенгайтиради / Фото: Чиқиндиларни бошқариш ва айланма иқтисодиётни ривожлантириш агентлиги.

Тошкент, Ўзбекистон (UzDaily.uz) — Ўзбекистон ва Туркия чиқиндиларни бошқариш соҳасидаги ҳамкорликни давом эттириш ва амалий тажриба алмашишга келишиб олди. Бу ҳақда Чиқиндиларни бошқариш ва циркуляр иқтисодиётни ривожлантириш агентлиги хабар берди.

Агентлик директори Шарифбек Ҳасанов Туркия Экология, урбанизация ва иқлим ўзгариши вазирлиги вакили Фатих Туранбей билан учрашув ўтказди.

Учрашувда чиқиндиларни бошқариш соҳасидаги ҳамкорликнинг жорий ҳолати ва уни ривожлантириш истиқболлари муҳокама қилинди. Хусусан, томонлар чиқиндиларни йиғиш, саралаш ва қайта ишлаш тизимларини такомиллаштириш бўйича тажриба алмашдилар.

Шунингдек, учрашув иштирокчилари замонавий экологик технологияларни жорий этиш ва мазкур соҳада амалга оширилаётган ислоҳотларни кўриб чиқдилар.

Туркиянинг амалий тажрибасини Ўзбекистонда қўллаш имкониятларига алоҳида эътибор қаратилди. Музокаралар якунлари бўйича томонлар тажриба алмашишни давом эттириш, амалий ҳамкорликни ривожлантириш ва келгусида қўшма ташаббусларни амалга оширишга келишиб олдилар.

 

 

Дилафруз Ниязова
Дилафруз Ниязова

Дилафруз Ниязова 2025 йилдан буён UzDaily жамоасида фаолият юритиб, нашрнинг ўзбек тилидаги версияси учун масъулдир.