Тошкент, Ўзбекистон (UzDaily.uz) — Ўзбекистон рақамли технологиялар вазири Шерзод Шерматов Туркиянинг Polat Holding компанияси вакиллари билан рақамли ва юқори технологиялар соҳасида ҳамкорлик истиқболларини муҳокама қилди. Учрашув Ўзбекистон ва Туркия ўртасида бизнесни қўллаб-қувватлаш бўйича Олий кенгашнинг биринчи йиғилиши доирасида бўлиб ўтди. Бу ҳақда Ўзбекистон Рақамли технологиялар вазирлиги хабар берди.
Холдинг вакиллари энергетика, кўчмас мулк, саноат ва юқори технологиялар соҳаларидаги фаолияти ҳақида маълумот бердилар. Шунингдек, амалга оширилаётган лойиҳалар ва инновацион ечимлар, жумладан, электрон тизимлар ҳамда замонавий технологик маҳсулотларни ишлаб чиқиш бўйича тажрибаларини тақдим этдилар.
Томонлар Ўзбекистонда рақамли технологияларни ривожлантириш, илғор ечимларни жорий этиш ва Polat Holding билан қўшма лойиҳаларни йўлга қўйиш имкониятларини кўриб чиқдилар.
Шерзод Шерматов компания вакилларини IT Park Uzbekistan'га ташриф буюришга таклиф қилди. Ташриф доирасида уларга мамлакатнинг IT-экотизими, маҳаллий IT-компанияларнинг имкониятлари ҳамда хорижий инвесторлар учун яратилган шарт-шароитлар билан танишиш таклиф этилди.
Учрашув якунида томонлар рақамли ва юқори технологиялар соҳасида Ўзбекистон ва Туркия ўртасидаги ҳамкорликни кенгайтириш, инвестиция имкониятларини ўрганиш ҳамда истиқболли ташаббусларни амалий лойиҳаларга айлантириш муҳимлигини таъкидладилар.