Ўзбекистон ва Европа Иттифоқи сармоявий ва молиявий ҳамкорликни кенгайтириш масалаларини муҳокама қилди

Тошкент, Ўзбекистон (UzDaily.uz) — 2025 йил 2 октябрь куни Ўзбекистон Республикаси Инвестициялар, саноат ва савдо вазирлигида вазир ўринбосари Шохрух Гуламов Европа Иттифоқининг Ўзбекистондаги Фавқулодда ва Мухтор Элчиси Тоиво Клаар билан учрашув ўтказди.

Суҳбат давомида томонлар Европа халқаро молия институтлари ва ҳукумат ташкилотларини жалб этган ҳолда қўшма лойиҳаларни амалга ошириш истиқболлари, шунингдек, амалий ҳамкорликни кенгайтиришга қаратилган йирик икки томонлама тадбирларга тайёргарлик масалаларини муҳокама қилдилар.

Инвестициявий ва молиявий ҳамкорликни янада ривожлантириш, шунингдек, янги ташаббусларни йўлга қўйиш мақсадида тажриба алмашиш муҳимлиги таъкидланди.

Томонлар Ўзбекистон ва Европа Иттифоқи ўртасидаги шерикликни мустаҳкамлаш учун янги имкониятларни очадиган лойиҳалар устида биргаликда ишлаш ва конструктив мулоқотни давом эттиришга тайёрлигини билдирдилар.