Тошкент, Ўзбекистон (UzDaily.uz) — Ўзбекистон Республикаси Туризм қўмитаси раиси Абдулазиз Аккулов Бирлашган Араб Амирликларида Etihad Airways авиакомпанияси раҳбарияти билан учрашди.
Томонлар авиация ва туризм соҳасидаги ҳамкорликни ривожлантириш, сайёҳлар оқимини кўпайтириш ҳамда Ўзбекистоннинг туристик салоҳиятини халқаро бозорларда илгари суриш масалаларини муҳокама қилди. Бу ҳақда Ўзбекистон Республикаси Туризм қўмитаси хабар берди.
2026 йил 9 августдан йўлга қўйилган Абу-Даби — Тошкент йўналишидаги мунтазам кунлик тўғридан-тўғри авиақатновларга алоҳида эътибор қаратилди.
Учрашув якунлари бўйича томонлар янги авиақатнов икки мамлакат ўртасида туристик, ишбилармонлик ва гуманитар алоқаларни ривожлантириш, шунингдек, Форс кўрфази мамлакатлари, Европа, Шимолий Америка ва Осиёдан Ўзбекистонга сайёҳларни жалб қилиш учун қўшимча имкониятлар яратаётганини таъкидлади.
Ҳамкорликнинг муҳим йўналишларидан бири Etihad Airways ва Uzbekistan Airways ўртасидаги кодшеринг келишуви бўлиб қолмоқда.
Ушбу келишув туфайли Etihad Airways йўловчилари Тошкентдан Самарқанд, Бухоро, Урганч, Нукус, Термиз, Фарғона, Наманган ва Андижонга сафарларини давом эттиришлари мумкин. Бу халқаро бозорларда нафақат пойтахт, балки Ўзбекистоннинг бошқа муҳим туристик марказларини ҳам тарғиб қилиш имконини беради.
Учрашув якунлари бўйича Туризм қўмитаси ва Etihad Airways қўшма маркетинг дастурини амалга ошириш тўғрисида келишув имзолади.
Ҳужжат Ўзбекистоннинг туристик салоҳияти ва Абу-Даби — Тошкент йўналишини авиакомпаниянинг асосий халқаро бозорларида биргаликда тарғиб қилиш, мамлакатнинг туристик имижи ва танилиши даражасини ошириш, шунингдек, туристик талабни рағбатлантиришни назарда тутади.
Томонлар, шунингдек, «Абу-Даби + Ўзбекистон» қўшма туристик маҳсулотини яратиш, учинчи мамлакатлардан сайёҳларни жалб қилиш учун Etihad Airways халқаро йўналишлар тармоғидан фойдаланиш, шунингдек, рақамли туристик маҳсулотлар ва лояллик дастурлари соҳасида тажриба алмашиш масалаларини кўриб чиқди.
Эришилган келишувларни амалий татбиқ этиш мақсадида томонлар ишчи даражадаги ҳамкорликни давом эттиришга келишиб олди.
