Тошкент, Ўзбекистон (UzDaily.uz) — Ўзбекистон Савдо-саноат палатаси Эрон Савдо, саноат, кончилик ва қишлоқ хўжалиги палатаси делегацияси билан икки томонлама бизнес ҳамкорлигини ривожлантириш бўйича амалий қадамларни муҳокама қилди. Томонлар бир кун олдин бўлиб ўтган аграр бизнес-форумда эришилган келишувларни амалга оширишга алоҳида эътибор қаратди. Бу ҳақда Ўзбекистон Савдо-саноат палатаси хабар берди.
Учрашувда Ўзбекистон Савдо-саноат палатаси раисининг ўринбосари Шерзод Ибрагимов ва раис маслаҳатчиси Алишер Шайхов иштирок этди. Эрон делегациясига Эрон Савдо-саноат, кончилик ва қишлоқ хўжалиги палатаси раисининг ўринбосари Ҳусейн Муъаззин бошчилик қилди.
Иштирокчилар икки мамлакат ўртасида савдо-иқтисодий ва инвестициявий ҳамкорликни янада ривожлантириш истиқболларини кўриб чиқди. Қишлоқ хўжалиги соҳасидаги ҳамкорликни кенгайтириш ва ҳудудлараро бизнес алоқаларини ривожлантириш масалаларига алоҳида эътибор қаратилди.
Шунингдек, бир кун олдин қишлоқ хўжалиги соҳасида ҳамкорлик масалаларига бағишланган Ўзбекистон–Эрон бизнес-форуми якунлари сарҳисоб қилинди. Форум доирасида имзоланган ҳамкорлик меморандумида белгиланган вазифаларни амалга оширишга алоҳида эътибор берилди.
Учрашув давомида икки палата вакиллари бизнес делегацияларининг ўзаро ташрифларини ташкил этиш ва B2B форматидаги учрашувларни мунтазам ўтказиш бўйича фикр алмашди. Шунингдек, икки мамлакат савдо-саноат палаталари ўртасидаги институционал ҳамкорликни янада мустаҳкамлаш ва тадбиркорлар ўртасидаги тўғридан-тўғри алоқаларни кенгайтириш масалалари муҳокама қилинди.
Учрашув якунида томонлар эришилган келишувларни амалий мазмун билан тўлдириш ва Ўзбекистон ҳамда Эрон ўртасидаги ишбилармонлик ҳамкорлигини фаоллаштиришга келишиб олди.
