Тошкент, Ўзбекистон (UzDaily.uz) — Ўзбекистон маданият ва санъатни ривожлантириш жамғармаси ҳамда Париждаги Centre Pompidou ўзаро ҳамкорлик тўғрисида битим имзолади. Ҳужжат узоқ муддатли шерикликни ривожлантириш ва Ўзбекистон санъати ҳамда маданиятига бағишланган кўргазма ташкил этишни назарда тутади.
Битим 21 октябрь куни Парижда Жамғарма раиси Гаянэ Умерова ва Centre Pompidou президенти Лоран Ле Бон ўртасидаги учрашув якунлари бўйича имзоланди.
Эришилган келишувлар доирасида Centre Pompidou марказида кўргазма ташкил этиш режалаштирилган. У халқаро аудиторияни Ўзбекистон санъати ва маданияти билан таништиришга қаратилган.
Centre Pompidou замонавий санъат соҳасидаги етакчи халқаро муассасалардан бири бўлиб, унинг тўпламида XX ва XXI асрларга оид кўплаб санъат асарлари мавжуд.
Ҳамкорлик Ўзбекистон Президенти Шавкат Мирзиёев ташаббуси билан амалга оширилаётган халқаро маданий алоқаларни мустаҳкамлаш ишлари доирасида ривожлантирилмоқда.
