Ўзбекистон ва BASF кимё маҳсулотларини маҳаллийлаштиришни муҳокама қилди
Тошкент, Ўзбекистон (UzDaily.uz) — Ўзбекистонда Германиянинг BASF компаниясига тегишли кимё маҳсулотлари ва технологик ечимларни тоғ-кон ва металлургия соҳалари учун маҳаллийлаштириш имконияти кўриб чиқилмоқда. Саноат кооперацияси ва давлат харидлари агентлигида «BASF Марказий Осиё» вакиллари билан ишчи учрашув бўлиб ўтди.
Музокараларда асосий эътибор маҳаллий корхоналар базасида тоғ-кон ва металлургия саноатида қўлланиладиган флотация реагентлари, махсус кимёвий моддалар ва ёрдамчи материаллар ишлаб чиқаришга қаратилди.
Учрашув иштирокчилари маҳаллий хомашё ва мавжуд ишлаб чиқариш қувватларининг салоҳиятини, шунингдек, технологияларни трансфер қилиш имкониятини муҳокама қилди. Ишлаб чиқаришни ташкил этиш учун тўғридан-тўғри инвестициялар киритиш, қўшма корхона ташкил этиш, шартнома асосида ишлаб чиқариш ва толлинг модели каби бир нечта шакл кўриб чиқилмоқда.
Музокараларнинг алоҳида йўналиши Ўзбекистонда ишлаб чиқарилган маҳсулотларни Марказий Осиёнинг бошқа мамлакатлари бозорларига экспорт қилиш истиқболларига бағишланди.
Учрашув якунлари бўйича Агентлик BASF компаниясига республикада ўзлаштириш учун тавсия этилган импорт ўрнини босувчи 20 турдаги маҳсулот бўйича лойиҳа тизерларини юборишни режалаштирмоқда.
BASF томонидан олинган таклифлар компаниянинг минтақавий ва глобал бизнес бўлинмалари билан биргаликда ўрганилади. Таҳлил натижасида BASF фаолият йўналишларига мос келадиган лойиҳалар аниқланади.
Компанияни қизиқтирган ташаббуслар бўйича лойиҳаларни янада ишлаб чиқиш мақсадида алоҳида техник музокаралар ўтказилиши режалаштирилмоқда.
